მეუფე პეტრე ცაავას საკითხს წმინდა სინოდი განიხილავს. ამის შესახებ ჟურნალისტებს რუსთაველმა მიტროპოლიტმა იოანე გამრეკელმა განუცხადა, რომელიც პატრიარქთან ერთად სიონის ტაძარში წირვას აღავლენდა.
მეუფე იოანეს განცხადებით, სინოდი იმსჯელებს გავიდა თუ არა მეუფე პეტრე ეკლესიის კანონიკური ჩარჩოებიდან.
ბოლო პერიოდში მეუფე პეტრე ცაავას მიმართ გამოთქმული ბრალდებების ერთ-ერთი ავტორი საპატრიარქოს იურისტიც იყო. ედიშერ ქარჩავას თქმით, მეუფე პეტრეს პატრიარქის მოკვლის სურვილი ჰქონდა.
ედიშერ ქარჩავას თქმით, საპატრიარქოში არის ჯგუფიც, რომელიც ამ პროცესში ჭყონდიდელ მიტროპოლიტთან ერთად არის ჩართული. საპატრიარქოს იურისტი მალე ამ ჯგუფის წევრების დასახელებასაც აპირებს.
ჭყონდიდელი მიტროპოლიტი, მეუფე პეტრე (ცაავა) საპატრიარქოს იურისტ ედიშერ ქარჩავას ბრალდებას ცილისწამებას უწოდებს:
„ეს არის სერიოზული ცილისწამება, ეს არის ძალიან დიდი გვირგვინი ნეტარების. ღმერთმა ღირსეულად მატარებინოს ეს გვირგვინი და ეს ჯვარი. არამარტო დეკანოზის საქმეზე, არამედ საპატრიარქოში და ქვეყანაში არსებული უსამართლობის წინააღმდეგ ავიმაღლე ხმა. ამით ჩემი ეროვნული, სახელმწიფოებრივი და მღვდელმთავრული ვალი მოვიხადე. ეკლესიაში არაფორმალური, ჩრდილოვანი მმართველობაა. პატრიარქი ისევ დეზინფორმირებულია“, – განაცხადა მეუფე პეტრემ.