აზერბაიჯანის საზღვრის დაცვის სამსახურის თანამშრომლებმა აფგან მუხთარლი მას შემდეგ დააკავეს, რაც საზღვარი საქართველოდან პირადობის დამადასტურებელი დოკუმენტის გარეშე, სასაზღვრო გამშვები პუნქტის გვერდის ავლით გადმოკვეთა. ამის შესახებ „საზოგადოებრივ მაუწყებელს“ აზერბაიჯანის გენერალური პროკურატურის პრესსამსახურში განუცხადეს.
„აფგან მუხთარლი საზღვრის დაცვის სამსახურის თანამშრომლებმა 29 მაისს დააკავეს, მას შემდეგ, რაც პირადობის დამადასტურებელი დოკუმენტის გარეშე გადმოკვეთა საზღვარი საქართველოდან, სასაზღვრო გამშვები პუნქტის გვერდის ავლით. დაკავების დროს ის არ დაემორჩილა მესაზღვრეების მოწოდებას და გაქცევა სცადა. დაკავების მომენტში, მას საბანკო ბარათი, 10 000 ევრო და სხვა ნივთები აღმოაჩნდა, ამ ეტაპზე, გამოძიება გრძელდება“, – განაცხადა ელდარ სულთანოვმა.
აფგან მუხთარლი თბილისში 29 მაისს, საღამოს გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. მუხთარლის ბრალი აზერბაიჯანის სისხლის სამართლის კოდექსის 318-ე (საზღვრის უკანონო კვეთა) და 206-ე (დეკლარაციის გარეშე დიდი ოდენობით თანხის გადატანა) მუხლებით აქვს წარდგენილი