ვენესუელამ გაერო-ს უშიშროების საბჭოს მიმართავს, რომ აშშ-ის მიერ მის სანაპიროსთან გემებზე განხორციელებული დარტყმები უკანონოდ გამოაცხადოს და ქვეყნის სუვერენიტეტს დაუჭიროს მხარი, – ამის შესახებ ინფორმაციას „როიტერი“ ავრცელებს.
გაერო-ში ვენესუელის ელჩი სამუელ მონკადა უშიშროების საბჭოსადმი გაგზავნილ წერილში აშშ-ის მიერ განხორციელებული იმ დარტყმების გამოძიებას ითხოვს, რომელსაც, სულ მცირე, 27 ადამიანის სიცოცხლე ემსხვერპლა.
„საბჭომ უნდა გააკეთოს განცხადება, რომელშიც კიდევ ერთხელ დაადასტურებს სახელმწიფოების, მათ შორის ვენესუელის სუვერენიტეტის, პოლიტიკური დამოუკიდებლობისა და ტერიტორიული მთლიანობის შეუზღუდავი პატივისცემის პრინციპს“, – აღნიშნულია გაერო-ს უშიშროების საბჭოს 15 წევრისადმი გაგზავნილ წერილში.
ცნობისთვის, აშშ-ის პრეზიდენტმა, დონალდ ტრამპმა კარიბის ზღვის სამხრეთ ნაწილში აშშ-ის სამხედრო ძალების მასშტაბური გაძლიერების ბრძანება გასცა და ცენტრალურ სადაზვერვო სააგენტოს ვენესუელაში საიდუმლო ოპერაციების ჩატარების უფლება მისცა.
ამერიკელმა სამხედროებმა, სულ მცირე, ხუთი ოპერაცია ჩაატარეს იმ გემების წინააღმდეგ, რომლებიც აშშ-ის პრეზიდენტის ადმინისტრაციის განცხადებით, ნარკოტიკებით ვაჭრობაში იყვნენ ჩართული.