ევროპიდან აშშ-ის სამხედრო ქვედანაყოფების გასვლის შესახებ თვეების განმავლობაში მიმდინარე სპეკულაციების შემდეგ, ოთხშაბათს, 29 ოქტომბერს, ესტონეთის თავდაცვის მინისტრმა, ჰანო პევკურმა დაადასტურა, რომ მის ქვეყანაში განლაგებული ჯარების რაოდენობას ოფიციალური ვაშინგტონი არ შეამცირებს.
იმავე დღეს, 29 ოქტომბერს, რუმინეთის თავდაცვის სამინისტრომ განაცხადა, რომ ქვეყანაში განლაგებული აშშ-ის ძალების რაოდენობა 2 200-დან დაახლოებით 1 000-მდე შემცირდება. მედიის ცნობით, შემცირება, შესაძლოა, ასევე განხორციელდეს ბულგარეთში, სლოვაკეთსა და უნგრეთში.
აშშ-მა ამ წლის დასაწყისში გამოაცხადა, რომ ევროპაში განლაგებული ჯარების რაოდენობის შემცირებას გეგმავს, რადგან ის ფოკუსირებას ინდოეთ-წყნარი ოკეანის აუზის რეგიონზე აპირებს. რაც შეეხება ევროპას, ამ რეგიონში თავისი ყოფნა ვაშინგტონმა 2022 წელს უკრაინაში რუსეთის სრულმასშტაბიანი შეჭრის შემდეგ გაზარდა.
პევკურის ცნობით, ვაშინგტონმა ესტონეთში სამხედრო ყოფნის შენარჩუნების შესახებ „მნიშვნელოვანი გადაწყვეტილება“ მიიღო.
თავდაცვის მინისტრმა ოთხშაბათს საღამოს ესტონეთის ტელე-რადიო მაუწყებელს (ERR) განუცხადა: „რაც შეეხება ესტონეთში განლაგებულ ჯარებს, მის შესახებ დადებითი გადაწყვეტილება არსებობს – შეერთებულმა შტატებმა გვაცნობა, რომ ჩვენი თანამშრომლობა გაგრძელდება ისე, როგორც აქამდე იყო. მე მათ ასევე გავუგზავნე შეტყობინება, რომ მზად ვართ ამ თანამშრომლობის გაღრმავებისთვის“.
მან ასევე დაამატა: „ვფიქრობ, დღეს შესაფერისი დღეა, მადლობა გადავუხადოთ შეერთებულ შტატებს – როგორც აქ, საელჩოში მყოფ ხალხს, ასევე პენტაგონში. ივლისში პიტ ჰეგსეტთან შეხვედრამ განაპირობა ის, რომ აშშ-ის ჯარები ესტონეთს არ დატოვებენ“.
დაახლოებით 700 ამერიკელი ჯარისკაცი ესტონეთში ტაპას სამხედრო ბაზაზე და რეედოს ყაზარმებშია განლაგებული.
თავდაცვის მინისტრმა ასევე განაცხადა: „შეერთებულ შტატებს ნათლად ესმის, რომ მათი აქ ყოფნა რამდენად მნიშვნელოვანია, შეკავების თვალსაზრისით. მიმაჩნია, რომ ეს ჩვენთვის კარგი სიგნალია. ერთია ის, რაც ჩვენ გავაკეთეთ დიპლომატიურ დონეზე და შინაარსობრივი თვალსაზრისით, მეორე კი ის, რომ გზავნილმა იმის თაობაზე, თუ რაოდენ აუცილებელია მათი აქ ყოფნა და რუსეთის შეკავება, მიზანს მიაღწია“.
პევკური ამბობს, რომ აშშ-სთან თანამშრომლობის გაძლიერება სამინისტროს ყოველდღიური მუშაობის ნაწილია.
„ცოტა ხნის წინ, ამერიკელებმა აქ „აბრამსის“ ტანკები ჩამოიყვანეს. თუ სხვა დანაყოფებიც გაივლიან აქ როტაციას, ისინი ჩვენთან თავს კომფორტულად იგრძნობენ“, – განუცხადა მან ERR-ს.
პევკურის თქმით, შეერთებულმა შტატებმა მისცა სიტყვიერი გარანტიები, რომ ესტონეთში მისი სამხედრო ყოფნა არ შეიცვლება. თუმცა, წერილობითი დადასტურება ჯერ არ მიუღია.
ოთხშაბათს, 29 ოქტომბერს პოლონეთისა და ლიეტუვის ოფიციალურმა პირებმა განაცხადეს, რომ თავიანთ ქვეყნებში აშშ-ის ძალების განლაგებაში რაიმე ცვლილების შესახებ ინფორმაცია არ გააჩნიათ.