თბილისის საკრებულოში კომისიების გაერთიანებული სხდომა გაიმართა, რომელზეც თბილისის ვიცე-მერობის კანდიდატმა, გიორგი ტყემალაძემ საკრებულოს წევრებს თბილისის მთავრობის შემადგენლობა წარუდგინა და იმ პრიორიტეტულ მიმართულებებზე ისაუბრა, რაც თბილისის მერიის სამოქმედო გეგმის ნაწილია.
თბილისის მერიის ინფორმაციით, გიორგი ტყემალაძემ წარმატებები უსურვა თბილისის ახლად არჩეულ საკრებულოს მომავალ საქმიანობაში და იმედი გამოთქვა, რომ თბილისის მუნიციპალიტეტის და საკრებულოს მჭიდრო თანამშრომლობით ქალაქისთვის ბევრი სასიკეთო საქმე გაკეთდება.
„მადლობას ვუხდი მოსახლეობას, რომ დაუჭირა მხარი ჩვენს გუნდს, თბილისის მერს. დღეს გაგაცნობთ იმ კანდიდატურებს, რომლებიც მერის მხრიდან არიან წარმოდგენილი. გუნდი დაკომპლექტებულია იმ შემადგენლობით, რა შემადგენლობითაც მუშაობდა თბილისის მთავრობა ბოლო წლების განმავლობაში. მხოლოდ რამდენიმე სიახლეა იმ თანამდებობებზე, რომელიც ვაკანტური იყო. მჯერა, რომ ისინი აუცილებლად წარმატებულები იქნებიან მომავალი ოთხი წლის განმავლობაში“, – განაცხადა გიორგი ტყემალაძემ.
საკრებულოს კომისიების გაერთიანებულ სხდომაზე თანხმობა გამოუცხადეს დედაქალაქის მთავრობის ახალ შემადგენლობას, რომელსაც საკრებულოს წევრები დღესვე უყრიან კენჭს.
დასამტკიცებლად წარდგენილი კანდიდატურები არიან: თბილისის მერიის ადმინისტრაციის უფროსი – ვლადიმერ ჭიღლაძე; გარემოს დაცვის საქალაქო სამსახურის უფროსი – პაატა ტოგონიძე; ეკონომიკური განვითარების საქალაქო სამსახურის უფროსი – ვახტანგ ლომჯარია; თბილისის მუნიციპალური ინსპექციის უფროსი – გოგი ჩიქოვანი; ინფრასტრუქტურის განვითარების საქალაქო სამსახურის უფროსი – გიორგი აბუთიძე; იურიდიული საქალაქო სამსახურის უფროსი – სერგო ბირკაძე; კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი – ირაკლი გვილავა; საფინანსო საქალაქო სამსახურის უფროსი – გაიოზ თალაკვაძე; მუნიციპალური შესყიდვების საქალაქო სამსახურის უფროსი – დავით მალანია; ჯანდაცვისა და სოციალური მომსახურების საქალაქო სამსახურის უფროსი – გელა ჩივიაშვილი; უსაფრთხოების საქალაქო სამსახურის უფროსი – ნიკოლოზ ჭონქაძე.