ბიზნესს დიდი როლი აქვს ამ ყველაფერში, ჩვენ შეგვიძლია, დავეხმაროთ ხარისხის მართვაში, – განუცხადა ჟურნალისტებს ბიზნესმენმა, ტელეკომპანია „იმედის“ მფლობელმა ირაკლი რუხაძემ პრემიერ-მინისტრსა და ბიზნესსექტორის წარმომადგენლებს შორის განათლების რეფორმის თემაზე გამართული შეხვედრის შემდეგ.
ბიზნესმენის განმარტებით, შეხვედრაზე პრემიერ-მინისტრისგან, ასევე განათლებისა და ეკონომიკის მინისტრებისგან განათლების სისტემაში დაგეგმილი რეფორმების შესახებ ინფორმაცია მოისმინეს.
„კარგია, რომ ამას აკეთებენ. ბიზნესს დიდი როლი აქვს ამ ყველაფერში. ჩვენ შეგვიძლია, დავეხმაროთ ხარისხის მართვაში. ჩვენ გვაქვს ბევრი ინფორმაცია, შეგვიძლია, მივაწოდოთ განათლების სამინისტროს, ეკონომიკის სამინისტროს, ჩვენ რა გვჭირდება, როგორ გვჭირდება, რომელი უნივერსიტეტებიდან უფრო კარგი ხალხი მოგვყავს, რას ვიხდით, რა არის საშუალო ხელფასი. ამიტომ ჩვენ შეგვიძლია, ამაში ჩავერთოთ.
მეორე მხრივ, ასევე შეგვიძლია ჩავერთოთ, რომ საჯარო უნივერსიტეტებში ქველმოქმედება გავწიოთ და ინფრასტრუქტურული პრობლემები, რომლებიც არის გადასაწყვეტი, მონაწილეობა მივიღოთ მათ გადაწყვეტაში. ამაზე ვისაუბრეთ ბევრი. პრემიერმა აგვიხსნა, ასევე განათლების მინისტრმა, ეკონომიკის მინისტრმა, რას აპირებენ, ძალიან საინტერესოა და მადლობა ღმერთს, რომ ამას ვაკეთებთ“, – განაცხადა ირაკლი რუხაძემ.
საქართველოს პრემიერ-მინისტრმა ირაკლი კობახიძემ განათლების რეფორმის კონცეფცია დღეს ბიზნეს ასოციაციის წევრებთან განიხილა. მთავრობის მეთაურმა ბიზნესთან განათლების სისტემაში არსებულ გამოწვევებსა და რეფორმის კონცეფციით გათვალისწინებულ ამოცანებზე დეტალურად ისაუბრა.