საპარლამენტო პოლიტიკური ჯგუფი „ხალხის ძალის“ თავმჯდომარე დიმიტრი ხუნდაძე მიიჩნევს, რომ საქართველოს შესახებ ევრონესტის რეზოლუციები არა პარტნიორული დამოკიდებულების მაჩვენებელია.
„ეს არის საქართველოს მორჩილების გეგმის ნაწილი და ეს იყო მორიგი შემოტევა საქართველოზე, მაგრამ რა თქმა უნდა, ჩვენ დავიცავთ ჩვენს ინტერესებს, ჩვენი ქვეყნისა და საზოგადოების უსაფრთხოებას. კიდევ ერთხელ ვამბობთ, რომ მზად ვართ პარტნიორული ურთიერთობისთვის და არა იმისთვის, რომ ვიღაცამ საქართველოზე უსამართლო ზეწოლა მოახდინოს, არჩევნები გამოაცხადოს გაყალბებულად, რა შემთხვევაშიც ამის არც ერთი ფაქტი არ არსებობს და ასევე, თვითგამოცხადებულად გამოაცხადოს საზოგადოების უმრავლესობის მიერ არჩეული ხელისუფლება. რა თქმა უნდა, ეს არ არის პარტნიორული დამოკიდებულება, ეს არის მტრული დამოკიდებულება“, – განაცხადა ხუნდაძემ.
საქართველოს პარლამენტის თავმჯდომარე შალვა პაპუაშვილი ევრონესტის საპარლამენტო ასამბლეის რეზოლუციებს განცხადებით გამოეხმაურა. როგორც განცხადებაშია აღნიშნული, ზოგიერთმა ევროპარლამენტარმა რეზოლუციის ტექსტებში დაამატა ისეთი ჩანაწერები, რაც ყოვლად მიუღებელი და აღმაშფოთებელია ქართული საზოგადოებისთვის.