საფრანგეთის იუსტიციის მინისტრს პატიმრობაში მყოფი სარკოზის „მხარდაჭერის“ გამო უჩივიან.
30-მდე იურისტმა საფრანგეთის იუსტიციის მინისტრის წინააღმდეგ საჩივარი შეიტანა და ჟერალდ დარმანენი ყოფილი პრეზიდენტის, ნიკოლა სარკოზის „არაპირდაპირ“ მხარდაჭერაში დაადანაშაულა, რომელიც საპატიმრო სასჯელს იხდის. სარკოზის, რომელიც 2007-2012 წლებში საფრანგეთის პრეზიდენტი იყო, სექტემბერში ხუთი წლით თავისუფლების აღკვეთა მიესაჯა იმის გამო, რომ მის საარჩევნო კამპანიას ლიბიელი დიქტატორი, მუამარ კადაფი აფინანსებდა. ოთხშაბათს, 29 ოქტომბერს, 70 წლის სარკოზი ციხეში ჟერალდ დარმანენმა მაინც მოინახულა, მიუხედავად პროკურორის გაფრთხილებისა, რომ ამას შეეძლო სასამართლოს დამოუკიდებლობისთვის შეეშალა ხელი. როგორც სააგენტო „ფრანს პრესს“ სანდო წყარომ გამუცხადა, იუსტიციის მინისტრი სარკოზის პარიზის ლა სანტეს ციხეში, საპატიმროს დირექტორის თანდასწრებით შეხვდა და სახელმწიფოს ყოფილი მეთაურის უსაფრთხოების ზომები განიხილა.
დაახლოებით 30 იურისტისგან შემდგარმა ჯგუფმა საჩივარი მას შემდეგ შეიტანა, რაც დარმანენმა სასამართლოს დაასწრო და, სარკოზის დაპატიმრებამდე, „მწუხარება“ გამოთქვა მისი ერთ-ერთი პოლიტიკური მენტორის მსჯავრდების გამო. საჩივარი ხუთშაბათს გვიან საღამოს შევიდა რესპუბლიკის მართლმსაჯულების სასამართლოში (CJR), რომელიც მოქმედი ან ყოფილი მინისტრების მიერ თანამდებობაზე ყოფნისას სავარაუდოდ ჩადენილ დანაშაულებს იხილავს. „დიდ მწუხარებას განვიცდი პრეზიდენტ სარკოზის გამო, – განუცხადა გასულ კვირას დარმანენმა მაუწყებელ France Inter-ს, – მე მისი კოლეგა ვიყავი და არ შემიძლია, სხვისი ბედის მიმართ უგრძნობი ვიყო“.
იურისტების საჩივარში, რომლის ასლსაც „ფრანს პრესი“ გაეცნო, ხაზგასმულია, რომ დარმანენმა „საჯაროდ გამოხატა თავისი პოზიცია საკითხზე, რომელიც მისი ადმინისტრაციული განკარგვის სფეროში შედის“. როგორც იურისტები საჩივარში წერენ, ისინი „განსაკუთრებით აღაშფოთა იუსტიციის მინისტრის მიერ სარკოზისთან არსებული პირადი კავშირების აფიშირებამ. აქედან გამომდინარე, იურისტებმა დარმანენი სარკოზისთვის „არაპირდაპირი მხარდაჭერის“ „გამოხატვაში“ დაადანაშაულეს. იურისტებს მიაჩნიათ, რომ „დარნანენის ასეთი განცხადებები კითხვის ნიშნის ქვეშ აყენებს დარმანენის მიუკერძოებლობასა და ობიექტურობას, რომელიც, როგორც იუსტიციის მინისტრი, ნეიტრალურ პოზიციას ვერ დაიკავებს მიმდინარე საქმეზე“. პარალელურად, სარკოზის იურისტთა გუნდმა, სააპელაციო სასამართლოს გადაწყვეტილებამდე, საფრანგეთის ექს-პრეზიდენტის გათავისუფლება მოითხოვა.
დარმანენი უკვე შეეცადა, პოლემიკის მონაწილეებისთვის გაეცა პასუხი. „ციხეში ყოფილი პრეზიდენტის უსაფრთხოების უზრუნველყოფა არანაირად არ უთხრის ძირს მაგისტრატი მოსამართლეების დამოუკიდებლობას. ეს ნაბიჯი ჩემი, როგორც ადმინისტრაციის ხელმძღვანელის, სიფხიზლის გამოხატულებაა“, – დაწერა დარმანენმა „X“ პლატფორმაზე. მეორე მსოფლიო ომის შემდეგ დაპატიმრებული ნაცისტურ-კოლაბორაციონისტული სახელმწიფოს მეთაურის, ანრი ფილიპ პეტენის შემდეგ, სარკოზი პირველი ფრანგი ლიდერია, რომელიც ციხეში იმყოფება.