„დღის ქრონიკაში“ შემოსავლების სამსახურის მეთოდოლოგიის დეპარტამენტის მთავარმა სპეციალისტმა, თინათინ გოგრიჭიანმა განმარტა, თუ რა სანქცია გავრცელდება იმ ფიზიკურ პირებზე, რომელმაც წარადგინა ქონების გადასახადის წლიური დეკლარაცია და დადგენილ ვადაში არ გადაიხადა გადასახადი.
მან საუბრისას ვადები დააზუსტა. მისივე თქმით, კანონმდებლობით არაუგვიანეს 1 ნოემბერი არის ვადა დეკლარაციის წარსადგენად, მაგრამ გამომდინარე იქედან, რომ 1 ნოემბერი არასამუშაო დღეა, დეკლარაციის წარდგენა 3 ნოემბრის ჩათვლით არის შესაძლებელი.
„რაც შეეხება გადასახადის გადახდის სავადო თარიღს, ანალოგიური წესი მოქმედებს. კანონმდებლობა გვავალებს, რომ არაუგვიანეს 15 ნოემბრისა მოხდეს გადახდა, თუმცა ვინაიდან არასამუშაო დღე ემთხვევა, შესაძლებელია არაუგვიანეს 17 ნოემბრისა მოხდეს გადასახადის გადახდა.
რაც შეეხება სანქციებს, იმ შემთხვევაში, თუ დეკლარაცია სავადო თარიღის ვადის დაცვითაა ჩაბარებული, თუმცა 17 ნოემბრამდე არ არის თანხა გადახდილი, ამ შემთხვევაში საურავი არის გადაუხდელი გადასახადის თანხის 0,05% ოდენობით, ყოველ ვადაგადაცილებულ დღეზე“, – აღნიშნა თინათინ გოგრიჭიანმა.