ძალიან იაფფასიანი პროპაგანდის მცდელობაა ადამიანისგან, რომელსაც უცხოელისთვის აქვს მიქირავებული ბინა. თუ ასე გულში მჯიღს იცემს და პატრიოტია, შეწყვიტოს ხელშეკრულება გერმანიის ელჩთან და მიაქირაოს ბინა ქართველს, – განაცხადა საქართველოს პარლამენტის თავმჯდომარემ, შალვა პაპუაშვილმა, მამუკა ხაზარაძის მიერ EMAAR-ის 6,5 მლრდ-იან ინვესტიციასთან დაკავშირებით გამოთქმული კრიტიკული მოსაზრებების შეფასებისას.
მისი თქმით, ინვესტიციების მიმართ ხაზარაძე-ჯაფარიძის დამოკიდებულება კარგად გამოჩნდა „ანაკლიის პორტის“ პროექტთან მიმართებაში.
„რაც შეეხება ამ ორ თაღლითს, რომლებიც მილიარდ-ნახევარს ითხოვდნენ საქართველოს ბიუჯეტიდან და თან იმასაც ბედავენ, რომ პოლიტიკაში იყვნენ და ხალხს ხმის მიცემა სთხოვონ, მათი დამოკიდებულება ინვესტიციებთან დაკავშირებით ჩვენ ვნახეთ ანაკლიაში, როდესაც ჩააფლავეს პროექტი. რომლის შესასრულებლადაც საქართველოს ხელისუფლებამ, მათ ყველა პირობა შეუქმნა – კონსტიტუციაში ჩანაწერით დაწყებული და ხელშეკრულების გადავადებებით გაგრძელებული. ბოლოს იქამდე მივიდნენ, რომ საქართველოს მოქალაქეებს უნდა გადაგვეხადა ხაზარაძისა და ჯაფარიძისთვის დივიდენდები, რომ ისინი წაგებაში არ წასულიყვნენ, ისეთი ბიზნესი ჰქონოდათ. წააგეს რამდენიმე არბიტრაჟი. საბოლოო ჯამში 7 მილიონზე მეტი აქვთ ბიუჯეტში გადასახდელი.
ერთი პარადოქსიც არის, ანუ ხაზარაძე ჩივის, რომ შეიძლება აშენდეს უძრავი ქონება, ბინები, რომელიც შეიძლება უცხოელებმა იყიდონ. თითქოს ახლა საქართველოში უცხოელები არ ყიდულობდნენ ბინებს. ასეთივე პროპაგანდა ჰქონდა, როდესაც „ჰუალინგი“ შენდებოდა. თითქოს იქ ნახევარი ჩინეთი ჩამოსახლდებოდა. ქსენოფობიურ კამპანიებს აწარმოებს ადამიანი, რომელსაც საკუთარი ბინა უცხოელისთვის აქვს მიქირავებული, ვგულისხმობ გერმანიის ელჩს.
რაც შეეხება თავად ამ პროექტს, ეს მნიშვნელოვანი ინვესტიციაა. ექვს-ნახევარ მილიარდ დოლარზე არის საუბარი. „ნაციონალური მოძრაობის“ მმართველობის პერიოდში არ შემოსულა ჯამში ამდენი ინვესტიცია, როდესაც ახლა ერთ კომპანიას შემოაქვს მარტო ეს ინვესტიცია. რაც გულისხმობს ჩვენი ეკონომიკის ზრდას, სამუშაო ადგილების შექმნას“, – განაცხადა შალვა პაპუაშვილმა.
შეგახსენებთ, რომ „ლელოს“ ლიდერი EMAAR ჯგუფის და საქართველოში უპრეცედენტო ინვესტიციის წინააღმდეგ გამოდის. მამუკა ხაზარაძე ცდილობს საზოგადოება დაარწმუნოს, რომ საქართველოში არაბიზაცია იწყება.