მიუხედავად იმისა, რომ საქართველომ ყველა რეფორმა გაატარა საარჩევნო მიმართულებით, რაც მათი მოთხოვნა იყო – მთლიანად პარტიულ სიაზე გადასვლა, ელექტრონული ხმის მიცემის წესის დამკვიდრება, მიუხედავად იმისა, რომ ჩართული იყვნენ უხეშად წინასაარჩევნო კამპანიაში და წარმატებას ვერ მიაღწიეს, რა თქმა უნდა ამაზე ექნებათ უარყოფითი დამოკიდებულება,- განაცხადა პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა, ევროკომისიის ანგარიშთან დაკავშირებულ მოლოდინებზე საუბრისას.
მისი თქმით, დოკუმენტში უარყოფითად იქნება მოხსენიებული ყველა ის ნაბიჯი, რომელიც საქართველომ ეროვნული ინტერესების დასაცავად გადადგა.
„უარყოფითი დამოკიდებულება ექნებათ იმასთან დაკავშირებით, რომ ვერც ერთი რევოლუცია ვერ შედგა. უარყოფითი დამოკიდებულება ექნებათ იმაზე, რომ ფარული დაფინანსება აიკრძალა საქართველოში არასამთავრობო ორგანიზაციების. უარყოფითი დამოკიდებულება ექნებათ იმაზე, რომ საქართველოში მედია სივრცე, განსხვავებით ბევრი ევროპული ქვეყნისგან არის რეალურად პლურალისტური. უარყოფითი დამოკიდებულება ექნებათ იმაზე, რომ სახელმწიფოს აქვს იმის უნარი, რომ რევოლუციები, რომელიც არის არაკონსტიტუციური ქმედება, არ დაუშვას. უარყოფითი დამოკიდებულება ექნებათ იმაზე, რომ ჩვენ ტრადიციული ღირებულებების და ადამიანის უფლებების ფუნდამენტური დამცველები ვართ და ჩვენთვის ლგბტ იდეოლოგია არ არის ჩვენი ქცევის განმაპირობებელი“, – განაცხადა ირაკლი ქადაგიშვილმა.
ევროკავშირის გაფართოების შესახებ დღეს ევროკომისიის ანგარიში გამოქვეყნდება.