გადაწყვეტილება, რაც ევროკავშირმა მიიღო, არის აბსოლუტურად უსამართლო, ყოველგვარ ზნეობას და საღ აზრს მოკლებული, – ამის შესახებ „ქართული დასის“ თავმჯდომარემ, ჯონდი ბაღათურიამ საქართველოს პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას განაცხადა.
ბაღათურიას თქმით, ევროკავშირი თუ დაემსგავსება ევროკავშირს, რომელიც თავიდან შეიქმნა, მაშინ „ჩვენთვის საინტერესო გახდება“.
„უბრალოდ, არ მინდა, კომენტარის გარეშე დავტოვო აბსურდი. ადამიანი მოსულია სახელმწიფო არხზე, მთავარ „თოქ შოუში“ აფასებს საკუთარი სამშობლოს წინააღმდეგ მიღებულ გადაწყვეტილებას, მხარს უჭერს ქვეყნის წინააღმდეგ მიღებულ გადაწყვეტილებას, ამბობს, რომ ეს არის საქართველოს და საქართველოს ხელისუფლების ბრალი, თუ სანქციები განხორციელდება ქვეყნის წინააღმდეგ ეს არის ძალიან კარგი, მაგრამ არ მოსწონს საქართველოში პლურალიზმი და უფრო პლურალისტურ ქვეყნად მიაჩნია უკრაინა, რასაც აქვე ამბობს. უკრაინაში ახლა ასეთი რაღაც რომ თქვას, სტუდიაშივე დახვრეტენ.
ყველა ოპოზიციური პარტიის ლიდერის მიმართ, რომელიც ახლა პარლამენტშია, პოროშენკოს, ყოფილი პრეზიდენტის, ტიმოშენკოს, ყველას წინააღმდეგ არის სისხლის სამართლის საქმეები აღძრული. რაღაც ევროპულ ღონისძიებებზე გასვლებს იმიზეზებენ ხოლმე, გადის ყოფილი პრეზიდენტი და არ უშვებენ ქვეყნიდან, რადგან მის წინააღმდეგ სისხლის სამართლის საქმეა აღძრული. შეფასება, რომ ასეთი ქვეყანა საქართველოზე უფრო დემოკრატიული, პლურალისტური, თავისუფალი, სამართლიანია და ამის საზოგადოებრივ არხზე თქმა, პირდაპირ საქართველოს მოსახლეობის წინაშე, არის უპრეცედენტო უზნეობა და უსამართლო შეფასება“, – აღნიშნა ჯონდი ბაღათურიამ გადაცემაში სტუმრად მყოფი პოლიტოლოგის, ნიკა ჩიტაძის განცხადებასთან დაკავშირებით.
გადაცემის წამყვანმა სტუმარს მიმართა, რომ ნებისმიერ ადამიანს აქვს უფლება, ჰქონდეს საკუთარი პოზიცია, რომელიც სხვების პოზიციისგან განსხვავდება, რაზეც ჯონდი ბაღათურიამ განაცხადა, რომ შესაძლოა, ნიკა ჩიტაძემ მის წინააღმდეგ თქვას აბსოლუტურად უსამართლო რამ და ამას არასდროს შეაფასებს უზნეობად, თუმცა „შენი ქვეყნის წინააღმდეგ როცა ამას ამბობ, მართალიც რომ იყო, ვალდებული ხარ, ამას მხარი არ დაუჭირო“.
„რა თქმა უნდა, შეიძლება, ნიკა ჩიტაძემ ჩემ წინააღმდეგ თქვას აბსოლუტურად უსამართლო რამ და არასდროს უზნეობად არ შევაფასებ. ვიტყვი, რომ ეს უსამართლობაა და არ არის სწორი. ბატონმა რამაზმაც, რომელსაც ძალიან დიდ პატივს ვცემ, შესაძლოა, რაღაც თქვას აბსოლუტურად უსამართლო, მაგრამ ამასაც უზნეობას ვერ დავარქმევ, თუმცა შენი ქვეყნის წინააღმდეგ როცა ამბობ, მართალიც რომ იყო, ვალდებული ხარ, ამას მხარი არ დაუჭირო. შენი ხალხის წინააღმდეგ ასეთ რაღაცას როცა ამბობ, თან ზიხარ სახელმწიფო არხზე და ამბობ, რომ პლურალიზმი არ მოგწონს საქართველოში, არ არის თავისუფალი მედია და უკრაინაში თავისუფალი მედია არსებობს, მაპატიეთ, მაგრამ ეს უზნეობაა“, – განაცხადა ბაღათურიამ.
ჯონდი ბაღათურიამ ასევე განაცხადა, რომ ევროკავშირი ახლა ხრწნის ბოლო სტადიაშია.
„ქათამი გინახავთ, რომ დაკლავენ, თავი არ აქვს და მაინც ფართხალებს? უფრო აქტიურად მოძრაობს, ვიდრე თავი რომ ჰქონდა ზედ მაშინ და ასეთ აგონიის მდგომარეობაში იმყოფება. შეიძლება, ევროკავშირს აქვს შანსი, გადაფორმატირდეს, იქნებ შენარჩუნებულიყო. ამას ლიდერი სჭირდება და ასეთი ლიდერები, სხვათა შორის, დიდი ქვეყნის ლიდერები არ არიან, თუმცა გამოიკვეთნენ, გამოიკვეთა ორბანი, გამოიკვეთა ბაბიში ჩეხოსლოვაკიაში, გამოიკვეთა სლოვაკეთი, შეიძლება, სერბეთი შეუერთდეს ამას, თუკი შეცდნენ და მიიღეს სერბეთიც. თუ ამ ლიდერებმა მოახერხეს ევროკავშირის გადაფორმატირება, მაშინ შეიძლება, ევროკავშირი ჩვენთვისაც საინტერესო გახდეს. ანუ, ევროკავშირი თუ დაემსგავსება ევროკავშირს, რომელიც თავიდან შეიქმნა, რისთვისაც შეიქმნა და რომელიც მაშინ, 2000-იანი წლების დასაწყისში მართლაც მოგვწონდა, მაშინ ეს ჩვენთვის საინტერესო გახდება და ღირს ევროკავშირთან საუბრის გაგრძელება“.
როგორც „ქართული დასის“ თავმჯდომარემ აღნიშნა, ევროკავშირს ახლა მართავს კორუმპირებული ელიტა, რომელმაც ევროკავშირში, პრაქტიკულად, ძალაუფლების უზურპაცია მოახდინა. „ეს არის ელიტა, რომელსაც არავინ ირჩევს, რომელსაც არანაირი ლეგიტიმაცია არ აქვს, მაგრამ ინერციით ლაპარაკობს მენტორული ტონით, რაღაც დიდაქტიკურ, ჭკუის სწავლების ტონალობაში და რეალობას აბსოლუტურად მოწყვეტილია, ასე განწყობილია და შურისძიების გრძნობა ამოძრავებს, თორემ, ბოლოს და ბოლოს, რა დააშავა საქართველომ ასეთი? უბრალოდ, ხომ იციან, რომ ამხელა რუსეთთან ომი წაგებული აქვთ და როგორ დაამთავრონ ომი, მარცხის აღიარება ეშინიათ, კიდევ და კიდევ უფრო ჭაობში ეფლობიან. ჭაობში რომ ადამიანი ფართხალებს, უფრო ღრმად ეფლობა და იძირება, ამ ადამიანს ჰგავს ახლა ევროკავშირი, ეს ლიდერები, თორემ ევროპელ ხალხზე არ ვლაპარაკობ. ევროპაში ძალიან ბევრი ძლიერი პოლიტიკოსია, რომელსაც, თუ საშუალება მიეცა, შეიძლება, ევროპული სახელმწიფოები მართლა გამოიყვანოს ამ ჩიხიდან, რომელ ჩიხშიც ევროკავშირი კორუმპირებულმა ელიტამ შეიყვანა“, – განაცხადა ბაღათურიამ.