რაც შეეხება შედარებებს, ერთი არის კრიმინალური დანაშაული, რაც ქალბატონი მზიას შემთხვევაში მოხდა – ეს იყო ინსტიტუციის მიმართ დამოკიდებულება, რის გამოც ხდება პასუხისგება, და არა უშუალოდ სილის გაწვნა, ტკივილი თუ გაწითლება. არ ვიცი თუ ადევნებდით თვალს პოლიტიკურ პროცესებს, არც ერთხელ და არც ათასჯერ არ გასჭირვებიათ ჩვენს პოლიტიკურ ლიდერებს თმენის ვალდებულების შენარჩუნება, – ასე უპასუხა საპარლამენტო უმრავლესობის დეპუტატმა, მარიამ ლაშხმა, გახარიას პარტიის დეპუტატ სოფო ხორგუანს, რომელმაც მზია ამაღლობელის და მცირეწლოვან შვილებთან ერთად მყოფ ლაშხზე თავდასხმის საქმეები ერთმანეთს შეადარა.
როგორც მარიამ ლაშხმა განმარტა, მან, საჩივრის შეტანით, დაიცვა არა მხოლოდ მისი შვილები, არამედ სხვებიც, ვინაიდან აქტივისტებს ამგვარი ქმედების დაკანონება სურდათ და ბავშვების უფლებების დარღვევას პასუხი უნდა მოჰყოლოდა.
“მინდა აღვნიშნო, როდესაც ეს გავაკეთე მე და საჩივარი შევიტანე, ამით არა მხოლოდ ჩემი ბავშვები დავიცავი, ამით დავიცავი სხვაც და პასუხი გავეცი იმ ქმედებას, რომლის დაკანონებაც სურდათ მათ [ოპოზიციონერ აქტივისტებს]. შესაბამისად, ეს ჯაჭვი უნდა გაწყვეტილიყო და იმ უმსგავსო საქციელს, რაც არის ბავშვების უფლებების დარღვევა, რეაგირება უნდა მოჰყოლოდა.
რაც შეეხება უშუალოდ პოლიტიკური ფიგურების მიმართ ნებისმიერი, სიტყვიერი შეურაცხყოფას თუ სხვა დანაშაულებს, საერთაშორისო მაგალითებს რომ გადავხედოთ, აშშ იქნება თუ ევროპის წამყვანი ქვეყნები, ვნახავთ, რა რეაგირებებია როგორც წლების, ისე ჯარიმების მიხედვით. შესაბამისად, ალბათ, ძალიან უადგილოა ამ ორი საქმის ერთმანეთთან შედარება,” – განაცხადა მარიამ ლაშხმა ადამიანის უფლებათა დაცვისა და სამოქალაქო ინტეგრაციის კომიტეტის სხდომის მიმდინარეობისას.