მიხეილ სააკაშვილი სასჯელაღსრულების დაწესებულების ნაცვლად, საავადმყოფოში სამ წელზე მეტი ხნით იყო, ამის მიზეზი ის ისტერია იყო, რომელიც ბრიუსელმა და მისმა ელჩმა ცრუ ნარატივზე დაყრდნობით აწარმოეს, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, ელჩი, სხვა ელჩებთან ერთად, იუსტიციის სამინისტროში ცრუ დემარშით მივიდა და სააკაშვილის ქვეყნიდან გაყვანა, რეალურად კი, მისი გათავისუფლება მოითხოვა.
„მაშინდელი სახალხო დამცველის ყალბი დასკვნები გახსოვთ, რომ თითქოს, მას დემენცია ჰქონდა. პრეზიდენტი ზელენსკი და სანდუ გახსოვთ, რომლებიც მიხეილ სააკაშვილთან დაკავშირებით ტყუილებს ამბობდნენ, თითქოს, მას აწამებდნენ. სანდუ და ზელენსკი ევროინტეგრაციის ტაშდაკრული ლიდერები რომ არიან, გამოვიდნენ და ტყუილი თქვეს. ამის შემდეგ ბოდიში არც სანდუს, არც ზელენსკის და არც ჰერჩინსკის არ მოუხდიათ, რომელიც იუსტიციის მინისტრთან დემარშით მივიდა. ამ დემარშიდან რამდენიმე კვირაში სტრასბურგის სასამართლომ თქვა, რომ მიხეილ სააკაშვილს ისეთი არაფერი სჭირდა, რომ მისი სხვაგან გადაყვანა მომხდარიყო. ეს მთლიანი პროცესი ბრიუსელის ისტერიის შედეგი და ნაწილი იყო, რომლითაც საქართველოში ცრუ ნარატივების გამყარება შეძლეს“, – განაცხადა შალვა პაპუაშვილმა.
მისი თქმით, ვიღაცაზე ამბობდნენ ნობელის პრემიის ლაურიატიაო, ასევე ამბობდნენ, სააკაშვილს დემენცია სჭირსო, რაც იყო ტყუილი.
„ქართველ ხალხს თვალში უტიფრად უყურებდნენ და ატყუებდნენ. ეს ყველაფერი დასრულდა, ის სასჯელაღსრულების დაწესებულებაშია, სადაც უნდა იყოს. ხედავთ, რომ გადაყვანასთან დაკავშირებით ხმას ვერ იღებს, რადგან ამ ცირკს კიდევ ერთხელ ვერც ის დადგამს, ვერვ ელჩი და ბრიუსელი. ერთი რამ მაინტერესებს, ალბათ, სანახავია, რა დაჯდა მისი ყოფნა საავადმყოფოში? გვაინტერესებს, რა თანხა არის ეს. შემდეგ, ბრიუსელის იმ ბიუროკრატებს უნდა მივაკითხოთ, რომლებმაც ეს ხარჯები ქართველ ხალხს უნდა აუნაზღაურონ, რადგან საინტერესოა, მათი ეს ისტერია და ყალბი ნარატივები ქართველ ხალხს რა დაუჯდა. ეს თავდასხმები ნაბიჯ-ნაბიჯ მოვიგერიეთ და იქ დავდექით, რომ ყველას საკადრისი პასუხი გაეცეს, ვინც სააკაშვილი აქ ჩამოიყვანა. სააკაშვილი აქ უკრაინის ხელისუფლებამ ჩამოიყვანა, დღეს, პრეზიდენტ ზელენსკის ტაშს რომ უკრავთ, მან სააკაშვილი ჩამოგვიყვანა, რომ ეს ქვეყანა აერია. ეს არის თქვენი ზელენსკი. ვინ იყვნენ ის ჯგუფები, რომლებიც დემენციაზე ტყუილებს იგონებდნენ? ზელენსკი, სანდუ, სხვა პოლიტიკოსები და ელჩები, რომლებმაც ეს უტიფარი ტყუილი გაკადრეს, თქვენ და საქართველოს. გაგანია ომი მიდის და აქედან გვივლიდნენ, რომ რამენაირად სიტუაცია აერიათ და საქართველო რუსეთთან ესკალაციაში ყოფილიყო, რომლის ბოლოც ომი იქნებოდა. ამას მოქნილობა სჭირდებოდა, რომ ამ სიტუაციიდან გამოვსულიყავით, გამოვედით და ახლა ყველას იმ ცრუ ნარატივისთვის უნდა მიეზღოს, რომელიც ქართველ ხალხს აკადრეს“, – განაცხადა შალვა პაპუაშვილმა.