Fox News-ი უკრაინაში კორუფციულ სკანდალს ვრცელ სტატიას უძღვნის. გამოცემა წერს, რომ ვოლოდიმირ ზელენსკი თავისი პრეზიდენტობის ყველაზე ღრმა კრიზისს ებრძვის, რადგან 100 მილიონი დოლარის გათეთრების სქემაში მისი უახლოესი გარემოცვის წევრები არიან გარეულები.
უკრაინელმა ყოფილმა ოფიციალურმა პირმა გამოცემასთან საუბარში აღნიშნა, რომ ქვეყანაში ადამიანის უფლებების უზარმაზარი დონის შელახვისა და გამხელილი კორუფციის გამო უკრაინელებს ბრძოლის მოტივაცია აღარ აქვთ. ამასთან, გაჩნდა ეჭვები, რომ კორუფციული სქემის შესახებ თვითონ ზელენსკიც იყო ინფორმირებული და მეტიც, უკრაინის პრეზიდენტი ამისგან გარკვეულ სარგებელსაც იღებდა.
„როგორც ჩანს, ეს ფულის გათეთრება 2022 წლიდან მიმდინარეობდა და ბევრი ადამიანი ცდილობდა მის შეჩერებას. ზოგი ამბობს, რომ ზელენსკი ინფორმირებული იყო ამ სქემების შესახებ და რომ მან დაამტკიცა ისინი. ასევე იყო ეჭვი, რომ ფული საზღვარგარეთის ანგარიშებზე ხვდებოდა, რითაც სარგებელს ზელენსკი და მისი უახლოესი წრე იღებდნენ.
ზელენსკი იყენებს თავის განსაკუთრებულ PR-ტალანტს და ამ გამოძიების გამო არ გადადგება. ის არ არის ისეთი ადამიანი, რომელსაც სირცხვილის გრძნობა აქვს, თუნდაც კორუფციული გამოძიება მიმდინარეობდეს… ზელენსკიმ ყველაფერი მიიღო ამ ომისგან. მას აქვს ძალაუფლების ვერტიკალი, ურყევი იმიჯი და მედიის მთელი ყურადღება“, – აცხადებს გამოცემის წყარო.
უკრაინის ორმა ანტიკორუფციულმა სტრუქტურამ, რომელთა უფლებამოსილების შეზღუდვასაც ზელენსკი ზაფხულში ცდილობდა, ენერგეტიკულ სფეროში პრეზიდენტის უახლოესი გარემოცვის წევრების მაქინაციების მტკიცებულებები ცოტა ხნის წინ გამოამჟღავნა.