უკრაინის პრეზიდენტს, ვოლოდიმირ ზელენსკის ანტიკორუფციული პროკურატურის მიერ გამოძიების დაწყების შემდეგ მთავრობის წარმომადგენლები ანდრეი ერმაკის გათავისუფლებას ურჩევენ. ინფორმაციას ამის შესახებ უკრაინული მედია ავრცელებს.
მედიის ცნობით, ბოლო კვირის განმავლობაში ზელენსკიმ შეხვედრები გამართა მთავრობის გუნდის ძირითად ფიგურებთან, რათა ეპოვა გამოსავალი, რომელიც ენერგეტიკის სექტორში კორუფციის შესახებ გამოძიების გამოქვეყნების შემდეგ სიტუაციას დაასტაბილურებდა. უკრაინის პრეზიდენტი უკრაინის პრემიერ-მინისტრს, იულია სვირიდენკოს, ვიცე-პრემიერ მიხაილ ფედოროვსა და უკრაინის მთავარი სადაზვერვო სამმართველოს უფროსს, კირილ ბუდანოვს შეხვდა.
როგორც „უკრაინსკაია პრავდას“ ანონიმურმა წყარომ განუცხადა, პრეზიდენტის მიერ გამოკითხულთა უმეტესობამ კრიზისიდან გამოსვლის სხვადასხვა გზა შესთავაზა, თუმცა თითქმის ყველამ ურჩია პრეზიდენტის ადმინისტრაციის ხელმძღვანელის, ანდრეი ერმაკის შეცვლა.
ცნობისთვის, უკრაინის სპეციალური ანტიკორუფციული პროკურატურა და ეროვნული ანტიკორუფციული ბიურო კორუფციულ სქემას იძიებენ, რომლის ორგანიზატორად პრეზიდენტ ვოლოდიმირ ზელენსკის ახლო მეგობარს, სტუდია „კვარტალ 95-ის“ თანამფლობელს, ტიმურ მინდიჩს ასახელებენ.
კორუფციული სკანდალის ფონზე თანამდებობა დატოვეს უკრაინის იუსტიციის და ენერგეტიკის მინისტრებმა, რომლებიც ჩანაწერებში ფიგურირებენ. უკრაინის ეროვნულ ანტიკორუფციულ ბიუროში აცხადებენ, რომ დანაშაულებრივი დაჯგუფების საქმიანობის გამოძიება – ოპერაცია „მიდასი“ 15 თვე გრძელდებოდა. ამ ხნის განმავლობაში დეტექტივების განკარგულებაში საქმის ფიგურანტების საუბრის ათასობით საათის ჩანაწერი აღმოჩნდა. უკრაინული მედიის ცნობით, თავად ბიზნესმენმა და სტუდია „კვარტალ 95“-ის თანამფლობელმა, ტიმურ მინდიჩმა საკუთარი სახლის ჩხრეკამდე რამდენიმე საათით ადრე უკრაინა დატოვა.