შეიძლება ითქვას, გარკვეული პოლიტიკური და დიპლომატიური სკანდალიც არის, როდესაც „ევროპის სახალხო პარტიის“ ქართველი წარმომადგენელი თინა ბოკუჩავა ეუთოს სახელით საუბრობს, – ასე შეაფასა „ქრონიკასთან“ საუბრისას გარემოს დაცვისა და ბუნებრივი რესურსების კომიტეტის თავმჯდომარე მაია ბითაძემ „ნაციონალური მოძრაობის“ თავმჯდომარის, თინა ბოკუჩავას განცხადება, რომ „ევროპის სახალხო პარტიამ“ და თანამოაზრე პოლიტიკურმა ჯგუფმა ეუთო-ს საპარლამენტო ასამბლეაში საქართველოზე საგანგებო რეზოლუცია მიიღო.
მაია ბითაძის თქმით, თინა ბოკუჩავა და გიგი წერეთელი ეუთოს საპარლამენტო ასამბლეაზე არაფორმალურად იმყოფებიან.
„ჩვენ მოვისმინეთ თინა ბოკუჩავას განცხადება, რომ თითქოს ეუთომ საქართველოსთან მიმართებით რეზოლუცია მიიღო სწორედ იმ ტექსტით და სულისკვეთებით, რაზედაც თვითონ თინა ბოკუჩავა და „ნაციონალური მოძრაობა“ ფიქრობს.
საქმე გვაქვს ძალიან სამარცხვინო ფაქტთან. ამგვარი განცხადება შეხვედრაზე არ გაჟღერებულა. ასეთ განცხადებას ჩვენ ვერც ეუთოს ვებგვერდზე ან ჩანაწერებში მოვიპოვებთ. შეიძლება ითქვას, გარკვეული პოლიტიკური და დიპლომატიური სკანდალიც არის, როდესაც „ევროპის სახალხო პარტიის“ ქართველი წარმომადგენელი თინა ბოკუჩავა ეუთოს სახელით საუბრობს.
ჩვენს პარტნიორებს ეუთოში ამის თაობაზე აუცილებლად ჩავაყენებთ საქმის კურსში. ეს არის არარსებული დოკუმენტი ეუთოს ფორმატისთვის იმიტომ, რომ ეს არის „ევროპის სახალხო პარტიის“, ფრაქციის შიდა დოკუმენტი. ასევე შევახსენებ ჩვენს საზოგადოებას, რომ ეუთოს ფორმატში „ევროპის სახალხო პარტიას“ არანაირი ფორმალური მანდატი არ გააჩნია“, – აღნიშნა მაია ბითაძემ.