საქართველოს საგარეო საქმეთა მინისტრმა, მაკა ბოჭორიშვილმა ისრაელის სახელმწიფოში ოფიციალური ვიზიტის ფარგლებში შეხვედრა გამართა ისრაელის ქნესეთის სპიკერთან, ამირ ოხანასთან.
საქართველოს საგარეო საქმეთა სამინისტროს ინფორმაციით, შეხვედრისას აღინიშნა ქართველ და ებრაელ ხალხებს შორის ისტორიული კავშირები და ორ ქვეყანას შორის არსებული მეგობრული ურთიერთობები.
„საუბარი შეეხო ორი ქვეყნის საკანონმდებლო ორგანოებს შორის თანამშრომლობას და ორმხრივი ურთიერთობების შემდგომი განმტკიცების მიმართულებით საპარლამენტო განზომილების მნიშვნელოვან როლს. ამ კონტექსტში აღინიშნა საქართველო-ისრაელის საპარლამენტო მეგობრობის ჯგუფების ნაყოფიერი საქმიანობა. განსაკუთრებული ყურადღება დაეთმო სავაჭრო-ეკონომიკური და ხალხთაშორისი კავშირების გაღრმავების საკითხს. საუბარი ასევე შეეხო რეგიონში არსებულ უსაფრთხოების გარემოს“, – ნათქვამია საქართველოს საგარეო საქმეთა სამინისტროს ინფორმაციაში.