საუდის არაბეთის მემკვიდრე პრინცმა, მოჰამედ ბინ სალმანმა პირობა დადო, რომ მისი ქვეყნის დაგეგმილი ინვესტიცია აშშ-ის ეკონომიკაში მომავალი წლის განმავლობაში თითქმის 1 ტრილიონ დოლარამდე გაიზრდება. ინფორმაციას ამის შესახებ ტელეკომპანია Fox News-ი ავრცელებს.
მოჰამედ ბინ სალმანმა ეს განცხადება პრეზიდენტ დონალდ ტრამპთან ოვალურ კაბინეტში შეხვედრისას გააკეთა და აღნიშნა, რომ ინვესტიციები აშშ-ის ეკონომიკის მასშტაბით განხორციელდება.
ტრამპმა თავდაპირველად განაცხადა, რომ ინვესტიცია, სულ მცირე, 600 მილიარდ დოლარს შეადგენს, მაგრამ საუდის არაბეთის ლიდერმა თავისი გამოსვლისას უფრო მაღალი თანხა გამოაცხადა.
„თქვენ დათანხმდით 600 მილიარდი დოლარის ინვესტირებას შეერთებულ შტატებში და რადგან ის ჩემი მეგობარია, შეიძლება ეს თანხა ტრილიონი გახდეს, მაგრამ ამაზე უნდა ვიმუშაო მასთან. თუმცა, 600 არის. 600 მილიარდს შეგვიძლია დავეყრდნოთ. მაგრამ, ეს რიცხვი შეიძლება ცოტათი მაღალიც იყოს“, – განაცხადა აშშ-ის პრეზიდენტმა.
„ეს ნიშნავს ინვესტიციებს ქარხნებში, კომპანიებში, ფულს უოლ სტრიტზე. და რაც მართლაც მნიშვნელოვანია, ეს არის სამუშაო ადგილები. ბევრი სამუშაო ადგილი. ჩვენ ბევრი სამუშაო ადგილი გვაქვს“, – განაცხადა დონალდ ტრამპმა.