საპარლამენტო უმრავლესობის წევრმა, „ქართული ოცნების“ ნაძალადევის რაიონის დელეგატმა ირაკლი ხელაძემ „დღის ქრონიკაში“ „ნაციონალური მოძრაობის“ თავმჯდომარის მიერ ეუთოში რეზოლუციის მიღების შესახებ გავრცელებულ ტყუილზე ისაუბრა.
დეპუტატმა აღნიშნა, რომ ამაში გასაკვირი არაფერია, რადგან საზოგადოებამ კარგად იცის, თუ რას წარმოადგენენ თინა ბოკუჩავა და კოლექტიური „ნაციონალური მოძრაობა“. მისივე თქმით, ისინი მუდმივად დარბიან ბრიუსელში და ითხოვენ ხან ხელისუფლების მაღალი თანამდებობის პირების დასანქცირებას, ხან საქართველოს მოქალაქეებზე გარკვეული სადამსჯელო სანქციების დაწესებას.
„ამასაც ყველა მიჩვეულია, როგორც ქვეყნის შიგნით, ასევე ქვეყნის გარეთ, რომ ეს ადამიანები ორიენტირებულები არიან მხოლოდ და მხოლოდ იმაზე, რომ ქვეყნის ინტერესები დააზიანონ. მდარე ხარისხის ფეიკ ნიუსები კარგად წარმოაჩენს მათ მდგომარეობას დღეს. იმდენად უსუსურ მდგომარეობაში არიან, იმდენად დასუსტებულები არიან, იმდენად გამოცლილი აქვთ ყველანაირი ჯანსაღი პოლიტიკური იარაღი, რომ გადასულები არიან დეზინფორმაციულ კამპანიაზე. ხომ წარმოგიდგენიათ, რამდენად უპასუხისმგებლოები არიან ეს ადამიანები, რომ ეუთოს საპარლამენტო ასამბლეის სახელით აკეთებენ განცხადებებს, თითქოს რაღაც კონკრეტული რეზოლუცია იყო საქართველოს წინააღმდეგ მიღებული“, – განაცხადა ხელაძემ.
მან ასევე დასძინა, რომ დღეს ასეთი ტყუილების გამოაშკარავება მარტივად შეიძლება.
თინა ბოკუჩავა და გიგი წერეთელი ამტკიცებდნენ, რომ ეუთოს საპარლამენტო ასამბლეამ მიიღო „ევროპის სახალხო პარტიის“ მიერ მომზადებული რეზოლუცია, რომელიც საქართველოს მიმართ კრიტიკული შინაარსის არის. „ნაცმოძრაობის“ ტყუილი მალევე გამჟღავნდა.