აშშ-ში ელიან, რომ უკრაინის პრეზიდენტი ვოლოდიმირ ზელენსკი რუსეთთან კონფლიქტის მოგვარების სამშვიდობო გეგმას მადლიერების დღემდე, ანუ 27 ნოემბრამდე მოაწერს ხელს. ინფორმაციას The Financial Times-ი უკრაინის ოფიციალურ პირებზე დაყრდნობით ავრცელებს.
მათი მტკიცებით, ამერიკულ მხარეს სურს შეთანხმება მოსკოვში მიმდინარე თვეს წარადგინოს და მთლიანი პროცესი დეკემბრის დასაწყისამდე დაასრულოს.
თუმცა, როგორც The Financial Times-ი წერს, ასეთი გრაფიკის აღსრულება ნაკლებად სავარაუდოა, რადგან, როგორც უკრაინის პრეზიდენტის ვოლოდიმირ ზელენსკის ოფისში განაცხადეს, ოფიციალური კიევი შეთანხმების რამდენიმე პუნქტს არ ეთანხმება.
ცნობისთვის, 19 ნოემბერს გამოცემა Axios-მა რუსეთ-უკრაინის ომის დასრულების გეგმა გაასაჯაროვა. გამოცემის ინფორმაციით, გეგმაზე აშშ და რუსეთი ფარულად მუშაობდნენ. Axios-ის ინფორმაციით, ამ გეგმის თანახმად, აშშ მზადაა, ყირიმი და დონბასი რუსეთის ტერიტორიად აღიაროს. ტრამპის გეგმა უკრაინისგან მაქსიმალურ დათმობებს მოითხოვს.