უკრაინის პრეზიდენტმა ვოლოდიმირ ზელენსკიმ ამერიკის შეერთებული შტატებისგან „ომის დასრულების გეგმა“ ოფიციალურად მიიღო და პრეზიდენტ დონალდ ტრამპთან მის განხილვას აპირებს. ინფორმაციას უკრაინის პრეზიდენტის ოფისი ავრცელებს.
უკრაინული მხარის განცხადებით, ოფიციალური კიევი ყველა შინაარსიან წინადადებას უჭერს მხარს, რომელსაც ნამდვილი მშვიდობის მოტანა შეუძლია.
„უკრაინის პრეზიდენტმა ამერიკული მხარისგან ოფიციალურად მიიღო გეგმის პროექტი, რომელსაც ამერიკული მხარის შეფასებით, დიპლომატიის გააქტიურება შეუძლია. უკრაინა რუსული შემოჭრის პირველივე წამებიდან მშვიდობისკენ მიისწრაფვის. ყველა შინაარსიან წინადადებას ვუჭერთ მხარს, რომელსაც ნამდვილი მშვიდობის მოტანა შეუძლია. უკრაინა წლის დასაწყისიდან მხარს უჭერდა პრეზიდენტ ტრამპის წინადადებებს, რათა სისხლის ღვრა დასრულებულიყო. ახლაც მზად ვართ კონსტრუქციულად ვიმუშაოთ ამერიკულ მხარესთან და ჩვენს პარტნიორებთან ევროპასა და მსოფლიოში, რათა შედეგი მშვიდობა იყოს“, – აღნიშნულია უკრაინის პრეზიდენტის ოფისის მიერ გავრცელებულ განცხადებაში.