სექტემბრის დასაქმების ანგარიშმა აჩვენა, რომ ამერიკის ეკონომიკა კვლავ ძლიერია, 119 000 ახალი სამუშაო ადგილი შეიქმნა, რაც მოლოდინს ორჯერ აღემატება, – ამის შესახებ თეთრი სახლის პრესმდივანმა, კეროლაინ ლევიტმა პრესკონფერენციაზე განაცხადა.
მისივე თქმით, ეს ზრდა პრეზიდენტ ტრამპის მიერ ზაფხულში გადასახადების შემცირებისა და მსოფლიოს ქვეყნებთან მრავალი სავაჭრო შეთანხმების მიღების შემდეგ მოხდა.
„კერძოდ, სექტემბერში მშენებლობაში სამუშაო ადგილები 19 000-ით გაიზარდა, რაც წლის განმავლობაში ყველაზე დიდი ყოველთვიური ზრდაა. ამ მყარი ყოველთვიური სამუშაო ადგილების ზრდის თითქმის მთელი ნაწილი კერძო სექტორიდან მოდის, ამერიკის მოქალაქეებზე და არა უცხოეთში დაბადებულ მუშაკებზე, რაც წინა ადმინისტრაციის პრაქტიკის საპირისპიროა. ინფლაცია ასევე კონტროლის ქვეშ რჩება და ამერიკელების ხელფასები წლის განმავლობაში 3.8%-ით იზრდება პრეზიდენტ ტრამპის პოლიტიკის გამო“, – განაცხადა ლევიტმა.
ამასთან, კეროლაინ ლევიტმა ინფლაციაზეც ისაუბრა და აღნიშნა, რომ ამის მიზეზი ბაიდენის ადმინისტრაციის არასწორი ნაბიჯებია.
„ჩვენ ვიცით, რომ ამერიკელები კვლავ იტანჯებიან ჯო ბაიდენისა და დემოკრატების მიერ გამოწვეული მაღალი ინფლაციისგან, მაგრამ პრეზიდენტი ტრამპი მნიშვნელოვან პროგრესს აღწევს ამ პრობლემის მოსაგვარებლად. ის არ შეწყვეტს მუშაობას, ვიდრე არ გადაჭრის პრობლემას. პრეზიდენტ ტრამპის მთელი ეკონომიკური დღის წესრიგი მიზნად ისახავს შრომისმოყვარე ამერიკელების ჯიბეებში მეტი ფულის დაბრუნებას“, – განაცხადა ლევიტმა.