თეთრ სახლში ნიუ-იორკის არჩეულ მერთან, ზოჰრან მამდანისთან შეხვედრის დროს აშშ-ის პრეზიდენტმა, დონალდ ტრამპმა უკრაინის სამშვიდობო გეგმაზე ისაუბრა და აღნიშნა, რომ უკრაინის პრეზიდენტმა, ვოლოდიმირ ზელენსკიმ უნდა მოიწონოს ეს გეგმა.
კითხვაზე, ესაუბრა თუ არა ვოლოდიმირ ზელენსკის 28-პუნქტიანი სამშვიდობო გეგმის შესახებ, ტრამპმა უპასუხა: „ჩვენ გვაქვს გეგმა. საშინელებაა, რაც ხდება. ეს არის ომი, რომელიც არასდროს უნდა მომხდარიყო“.
„ვფიქრობთ, გვაქვს მშვიდობის დამყარების გზა. მან [ზელენსკიმ] უნდა დაამტკიცოს ეს [გეგმა]“, – აღნიშნა აშშ-ის პრეზიდენტმა.
როდესაც ერთ-ერთმა ჟურნალისტმა უთხრა, რომ სამშვიდობო გეგმას გარკვეული კრიტიკა მოჰყვა, ტრამპმა უპასუხა: „იმას გულისხმობთ, რომ მას [ზელენსკის] არ მოსწონს? უნდა მოეწონოს და თუ არ მოსწონს, მაშინ ალბათ უბრალოდ გააგრძელონ ბრძოლა. რაღაც მომენტში, მას მოუწევს რაღაცის მიღება. გახსოვთ ოვალურ კაბინეტში, არც ისე დიდი ხნის წინ, ვთქვი: „შენ ხელში კოზირები არ გაქვს“.