ისრაელმა ღაზაზე იერიში მიიტანა. თავდასხმის შედეგად, სულ მცირე, 20 ადამიანი დაიღუპა.
როგორც „როიტერი“ იუწყება, თვითმხილველები და ადგილობრივი სამედიცინო პერსონალი აცხადებს, რომ პირველი თავდასხმა ღაზაში, მჭიდროდ დასახლებულ რიმალის უბანში მანქანაზე განხორციელდა. შემდეგი იერიში კი, ისრაელის საჰაერო ძალებმა ორ სახლზე და ნუსეირატის ბანაკზე განახორციელეს.
ისრაელის შეიარაღებულ ძალებში აცხადებენ, რომ თავდასხმების მიზეზი არის ისრაელის მიერ კონტროლირებად ტერიტორიაზე გადასული შეიარაღებული პირი, რასაც ცეცხლის შეწყვეტის შეთანხმების აშკარა დარღვევა უწოდეს. სამხედრო ძალებმა განაცხადეს, რომ საპასუხოდ აწარმოებდნენ დარტყმებს სამიზნეებზე ღაზაში.
„ჰამასის“ ოფიციალურმა წარმომადგენელმა უარყო ისრაელის სამხედრო ძალების ბრალდებები და მათ უსაფუძვლო უწოდა.
შეგახსენებთ, რომ ისრაელმა და „ჰამასმა“ არაერთხელ დაადანაშაულეს ერთმანეთი მხარეებს შორის მიღწეული შეთანხმების დარღვევაში.