„ბიბისისთან“ დაკავშირებით, რაც სახელმწიფოს შეუძლია, ყველა რესურსს და ბერკეტს გამოვიყენებთ, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა.
მისივე თქმით, „ბიბისის“ მასალა სახელმწიფო რეპუტაციის დაზიანების პირდაპირ გამიზნული მცდელობაა.
„ეს ცალსახად სახელმწიფოს და ხელისუფლების დისკრედიტაციის მცდელობაა. ამ აბსოლუტური სიგიჟის ავტორებიც, მსახიობებიც, რეჟისორებიც და მაყურებლებიც თავად არიან. ეს ყველაფერი თავადვე შექმნეს. ჩვენ, რა თქმა უნდა, არ ვაპირებთ ამ ყველაფერს ბურბუშელით ხელში ვუყუროთ. რაც სახელმწიფოს შეუძლია, ყველა რესურსსა და ბერკეტს გამოვიყენებთ. იქნება ეს გამოძიება, ბრიტანული მარეგულირებლისთვის მიმართვა და საერთაშორისო გამოძიება, თუ ამის საჭიროებაც იქნება. საქართველოს რეპუტაციის დაცვას ყველა გზით შევეცდებით.
აქ „ბიბისის“ ინტერესი ნაკლებად მნიშვნელოვანია. ჩვენ ვხედავთ, რომ „ბიბისი“ გამოყენებულია, როგორც ბერკეტი სხვა ფარული ინტერესების გატარებისთვის. სამწუხაროდ, ეს ერთადერთი შემთხვევა არ არის, როდესაც ჩვენ „ბიბისის“ მხრიდან ამას ვხედავთ. სამწუხაროა, ოდესღაც ნამდვილად უმწიკლო რეპუტაციის მედიასაშუალება დღეს ჩამოლაბორანტდა და მზად არის, არაფრიდან ჭიქაში ქარიშხალი შექმნას. ჩვენთვის ნაკლებად საინტერესოა, აქ ვისთვის რა ინტერესია. აქ მთავარია, რომ სახელმწიფო რეპუტაციის დაზიანების პირდაპირ გამიზნული მცდელობაა“, – განაცხადა მახაშვილმა.
„ბიბისიმ“ გამოაქვეყნა მასალა, სათაურით: „„ბიბისის“ მტკიცებულებების თანახმად, ქართველი დემონსტრანტების წინააღმდეგ პირველი მსოფლიო ომის დროინდელი ქიმიური ნივთიერება გამოიყენეს“. კერძოდ, „ბიბისი“ პირველი მსოფლიო ომის დროინდელი ქიმიური იარაღის სავარაუდო გამოყენებაზე საუბრობს. მედიასაშუალება წყაროდ ასახელებს პედიატრ კონსტანტინე ჩახუნაშვილს, განსაკუთრებულ დავალებათა დეპარტამენტის ყოფილ უფროსს, ლაშა შერგელაშვილს, ექსპერტ კრისტოფერ ჰოლშტეგეს. რესპონდენტები არიან აგრეთვე ეკა გიგაური და გიორგი ბაჩიაშვილი. „ბიბისის“ მასალაში ლაშა შერგელაშვილი აცხადებს, რომ, „მისი აზრით, ეს იგივე ნივთიერებაა, რომლის გამოცდაც მას წყლის ჭავლისთვის 2009 წელს სთხოვეს“. ამასთან, „ბიბისის“ ცნობით, „გამოძიების შედეგებს საქართველოს ხელისუფლებაში აბსურდული უწოდეს და განაცხადეს, რომ პოლიციამ კანონიერად იმოქმედა სასტიკი დამნაშავეების უკანონო ქმედებების საპასუხოდ“.