შალვა პაპუაშვილი აშშ-ის თავდაცვის სტრატეგიაში ევროკავშირის შესახებ ჩანაწერებს გამოეხმაურა. საქართველოს პარლამენტის თავმჯდომარის თქმით, თბილისი უკვე რამდენიმე წელია ზუსტად იგივეს ეუბნება ბრიუსელს, თუმცა ყრუ კედელს აწყდება.
მან ასევე აღნიშნა, რომ არსებული ინფორმაციით, ევროკავშირის საგარეო პოლიტიკას თეთრ სახლში „ესტონიზაციად“ მოიხსენიებენ და ეს ტერმინი ჩამოყალიბდა, როგორც იმ თავქარიანი აქტივიზმის ასახვა, რომლითაც ბრიუსელმა ევროკავშირი ეკონომიკურ და ღირებულებით სტაგნაციამდე მიიყვანა.
„ზუსტად იგივე გაიმეორა ამერიკის შეერთებულმა შტატებმა საკუთარ სტრატეგიაში, რასაც საქართველოს პრემიერ-მინისტრი ირაკლი კობახიძე ამბობდა. ევროკავშირი, რომელსაც მსოფლიო ეკონომიკის 24% ეკავა, დღეს 17%-ზეა ჩამოსული, ზუსტად იმ თავქარიანი აქტივისტური პოზიციის გამო, „ესტონიზაციის“ გამო, რომელიც ევროკავშირს სჭირს. იმედია ახლა მაინც განგაშის ზარად მიიღებენ ამ ყველაფერს.
სტრატეგიაში ხაზია გასმული, რომ აშშ პატრიოტულ ძალებზე ამყარებს იმედებს და ჩვენც არაერთხელ გვითქვამს, რომ მივესალმებით იმ გამოღვიძებას, რაც ევროკავშირის სხვადასხვა ქვეყანაში ხდება, სადაც პატრიოტული ძალები უფრო მეტ ძალას იკრებენ. იმედი გვაქვს, ევროპის ყველა ქვეყანაში პატრიოტული ძალები მოვლენ ხელისუფლებაში“, – განაცხადა პაპუაშვილმა.
მისივე თქმით, ეს არის თბილისსა და ბრიუსელს შორის ურთიერთობების აღდგენისა და ბრიუსელის პოლიტიკის გაკეთილშობილების ერთადერთი გზა.