ჩვენ არაერთხელ გვსმენია, რომ თითქოს ვიღაცას ვესხმით თავს. საქართველო არავის ესხმის თავს, საქართველო იცავს თავს უსამართლო დამოკიდებულებისგან და ეს უსამართლო დამოკიდებულება, სამწუხაროდ არაერთხელ ვიხილეთ ჩვენ ბიუროკრატების მხრიდან, – განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა.
მაკა ბოჭორიშვილის თქმით, ერთგვარად შესაძლებელია თქმა, რომ საქართველო იყო პირველი, ვინც პრობლემებზე დაიწყო საუბარი.
„ჩვენ ვიყავით პირველები, ვინც გავაჟღერეთ, რომ რაღაც სწორი არ არის. დამოკიდებულებაში არ არის სწორი. ვინც, ასე ვთქვათ, ხმა ავიმაღლეთ იმ უსამართლო დამოკიდებულებასთან მიმართებაში, რაც ჩვენი ქვეყნის მაგალითზე ვიხილეთ. იმ პრობლემებზეც გავამახვილეთ ყურადღება, რაც გამოჩნდა ზუსტად საქართველოსთან მიმართებაში. იგივე ევროპარლამენტში, ევროპარლამენტის რეზოლუციები ხომ საუკეთესო მაგალითი იყო. ასე შეიძლება არაფერი დაჰკლებოდა ჩვენს ქვეყანას და შეიძლებოდა საერთოდ არანაირი კომენტარი არ გაგეკეთებინა, არაფერი გაგეკეთებინა, მაგრამ ნამდვილად სამწუხაროა, როდესაც ის ინსტიტუტები, ორგანიზაცია, რომლისკენაც მიისწრაფვი, რის გამოც მიისწრაფვი და ძალიან ხშირად არის ხოლმე ამაზე საუბარი, ფასეულობებზე ზუსტად აქცენტის გაკეთება, სწორედ ამ ფასეულობებს ამსხვრევს. იმის ნაცვლად, რომ რაღაც სიმართლე, რეალობა, ობიექტურობა დაიდოს საფუძვლად, პარალელურ რეალობას ქმნის, აბსტრაქტულ საკითხებზე საუბრობს, აბსოლუტურად მოწყვეტილია რეალობას და სიმართლეს. ასე აგებს მის პოლიტიკურ დღის წესრიგს. ეს, რა თქმა უნდა, ჩვენთვის მიუღებელი აღმოჩნდა და ერთ-ერთი პირველები ვიყავით, ვინც ამაზე დავიწყეთ საუბარი.
ახლა უკვე ასეთივე კრიტიკა ისმის აშშ-დან, თუმცა ჩვენს შემთხვევაში ეს კრიტიკა, რა თქმა უნდა, კრიტიკად არ იყო აღქმული და ეს მოინათლა თავდასხმად.
ჩვენ არაერთხელ გვსმენია, რომ თითქოს ვიღაცას ვესხმით თავს. საქართველო არავის ესხმის თავს, საქართველო იცავს თავს უსამართლო დამოკიდებულებისგან და ეს უსამართლო დამოკიდებულება, სამწუხაროდ არაერთხელ ვიხილეთ ჩვენ იმ ბიუროკრატების მხრიდან, რომლებიც ბრიუსელშიც არიან, სხვა დედაქალაქებშიც არიან, გარკვეულწილად მონაწილეობენ ევროკავშირის პოლიტიკის ჩამოყალიბებაში, გავლენას ახდენენ ევროკავშირის პოლიტიკაზე საქართველოსთან მიმართებაში“, – აღნიშნა მაკა ბოჭორიშვილმა.