ჩვენ ვფიქრობთ და როგორც ჩანს, ასე ამბობენ ევროპელი ლიდერები, რომ არც ერთი სახელმწიფოს შიდასამქეებში არ უნდა ჩაერიოს ვინმე – ამას ვითხოვთ ჩვენც, – განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ.
იგი ამგვარად გამოეხმაურა ევრობიუროკრატების განცხადებებს იმის შესახებ, რომ მათთვის მიუღებელია აშშ-ის მხრიდან კრიტიკა და სხვა ქვეყნის შიდა საქმეებში ჩარევა.
„თუკი ამერიკის შეერთებული შტატებისთვის არ შეიძლება ევროპის შიდასაქმეებში ჩარევა, არც ევროპისთვის შეიძლება საქართველოს შიდასაქმეებში ჩარევა. ეს მარტივი ჭეშმარიტებაა. ის, რომ გზავნილებში ამერიკის ადმინისტრაციასთან გვაქვს თანხვედრა, ეს რა თქმა უნდა, კარგია. ასევე კარგია ისიც, რომ როგორც ჩვენ ვფიქრობთ და როგორც ჩანს, ასე ამბობენ ევროპელი ლიდერები, რომ არც ერთი სახელმწიფოს შიდასამქეებში არ უნდა ჩაერიოს ვინმე – ამას ვითხოვთ ჩვენც“, – განაცხადა დეპუტატმა.
ევროკავშირის საგარეო პოლიტიკის ხელმძღვანელმა, კაია კალასმა აშშ-ის სტრატეგიული უსაფრთხოების სტრატეგიაში ევროკავშირის პოლიტიკის კრიტიკის შესახებ განაცხადა: „ჩვენც შეგვიძლია ბევრი რამ მივუთითოთ, რაც ამერიკაში არასწორია. მაგრამ ეს არ არის ჩვენი მუშაობის მეთოდი. ჩვენ არ ვაპირებთ სხვა ქვეყნების შიდა საქმეებში ჩარევას“.