თუკი რეალური ცვლილებები არ მოხდა პოლიტიკაში და თუკი არ დაინახეს სიმართლე და შესაბამისი ზომები არ მიიღეს, ეს ომი შეიძლება უშველებელ უბედურებაში გადაიზარდოს, რომელიც თავს არა მარტო ევროპას, არამედ მთელს მსოფლიოს, კაცობრიობას დაატყდება, – განაცხადა გიორგი ვოლსკიმ ევროკავშირის ლიდერების ბოლოდროინდელ პოლიტიკაზე საუბრისას. პარლამენტის პირველი ვიცე-სპიკერი აღნიშნავს, რომ ევროპელი ლიდერების ნაწილის განცხადებები მათივე ამომრჩევლების მოსაზრებებს ეწინააღმდეგება.
„დღეს რა განცხადებებსაც აკეთებენ ევროკავშირის ლიდერები, აბსოლუტურად საწინააღმდეგოა იმ მიდგომებისა და ხედვებისა, რომლებიც ამ ქვეყნებში საზოგადოებებს ანუ მათ ამომრჩევლებს აქვთ. თავიანთ ამომრჩევლებშიც ძალიან დაცემულია ზოგიერთი წამყვანი ქვეყნის ლიდერის რეიტინგი. წლებია ამაზე ვსაუბრობთ. ეს გახდა იმის მიზეზი, რომ თითქოსდა დავცილდით ევროპულ სტანდარტებს და თითქოსდა ჩვენი საგარეო კურსი შეიცვალა. ჩვენი საგარეო კურსი არ შეცვლილა – ევროპა შეიცვალა. უსაფრთხოების თემა დღეს ევროპაში დიდი კითხვის ნიშნის ქვეშ არის“, – მიიჩნევს ვოლსკი.