ჩვენ მივიღეთ ინფორმაცია ისრაელის ერთ-ერთი პარლამენტარისგან, რომელიც საქართველოში ჩამოდიოდა. ის ამბობს, რომ ქნესეთში იურიდიულმა განყოფილებამ უთხრა, რომ სასურველია არ წავიდეს საქართველოში, – განაცხადა ბიზნესმენმა იციკ მოშემ.
მისივე თქმით, მიუხედავად ამ ინფორმაციისა, პარლამენტარებს არ გაუუქმებიათ საქართველოში ვიზიტი.
„დელეგაციის წევრების ნახევარი საქართველოშია უკვე, ბიზნესფორუმი და ისრაელის კვირეული ტარდება. მჯერა საქართველოს უსაფრთხოების. მინდა გითხრათ, რომ მსოფლიოსთან შედარებით, საქართველოში ყველაზე კარგი სიტუაციაა. ბიზნეს ფორუმის და ისრაელის კვირეულის ჩატარება საქართველოში ნიშნავს, რომ საქართველო უსაფრთხო ქვეყანაა და არაფერი დაზიანდება“, – აღნიშნა ბიზნესმენმა.
სახელმწიფო უსაფრთხოების სამსახური უწყება გამოეხმაურა ზოგიერთი მედიასაშუალების ინფორმაციას, თითქოს ქნესეთის რამდენიმე წევრმა ტერორისტული თავდასხმების საფრთხის გამო, საქართველოში დაგეგმილი ვიზიტი გააუქმა.
სუსი-ის თქმით, სახელმწიფო უსაფრთხოების სამსახურში დაბარებულმა იციკ მოშემ გავრცელებულ დეზინფორმაციასთან დაკავშირებით კონკრეტული და სერიოზული წყარო ვერ დაასახელა.