სერბეთში ოფიციალური ვიზიტის ფარგლებში, ჩემს სერბ კოლეგას, ალექსანდარ ვუჩიჩს შევხვდი.
პირისპირ გამართულ შეხვედრაზე საქართველოსა და სერბეთს შორის პოლიტიკური, ეკონომიკური, ტექნოლოგიური და კულტურული მიმართულებით თანამშრომლობის გაღრმავებასთან დაკავშირებით ვიმსჯელეთ.
ასევე ვისაუბრეთ არსებული მეგობრული კავშირების, კულტურული სიახლოვის, საერთო ღირებულებებისა და გამოწვევების თაობაზე, რაც ურთიერთობათა შემდგომი განვითარებისთვის მტკიცე საფუძველს წარმოადგენს.
შეხვედრაზე განვიხილეთ საქართველოსა და სერბეთში მიმდინარე პოლიტიკური პროცესები, ასევე ყურადღება გავამახვილეთ მსოფლიოში მშვიდობისა და სტაბილურობის მნიშვნელობაზე.
როგორც შეხვედრაზე აღვნიშნე, საქართველოსთვის ფასეულია სერბეთის მხარდაჭერა საქართველოს სუვერენიტეტისა და ტერიტორიული მთლიანობისადმი.
პირისპირ შეხვედრის შემდეგ, მოლაპარაკება გაფართოებული ფორმატით გაგრძელდა.
განვიხილეთ საქართველოსა და სერბეთის რესპუბლიკას შორის ორმხრივი, მათ შორის დარგობრივი თანამშრომლობის ძირითადი მიმართულებები და მათი გაღრმავების პერსპექტივები. აღვნიშნეთ, რომ ქვეყნებს შორის ორმხრივი ვაჭრობა ზრდის ტენდენციით გამოირჩევა, თუმცა ამ მხრივ გაცილებით მეტი შესაძლებლობები არსებობს.
შეხვედრაზე განვაცხადე, რომ პრეზიდენტის დონეზე განხორციელებული პირველი ვიზიტი საქართველო-სერბეთის ურთიერთობებსა და ორმხრივ დიალოგს დამატებით იმპულს შესძენს.
ასევე ვისაუბრეთ რეგიონულ თანამშრომლობასთან დაკავშირებულ საკითხებზე და ახალი გეოპოლიტიკური რეალობის ფონზე შუა დერეფნის გაზრდილ მნიშვნელობაზე. შეხვედრაზე აღვნიშნე, რომ საქართველო ყველაფერს აკეთებს იმისათვის, რომ ხელი შეუწყოს დერეფნის განვითარებას, მის უსაფრთხოებასა და ეფექტიანად ფუნქციონირებას.
შეხვედრაზე ხაზი გაესვა, რომ საქართველოს ხელისუფლების მიერ არჩეული მშვიდობის, სტაბილურობისა და ეკონომიკური კეთილდღეობის ვექტორი ურყევია და ამას მოწმობს საქართველოს ტრადიციული სამშვიდობო პოლიტიკა სამხრეთ კავკასიაში, რომელიც მიზნად ისახავს რეგიონში გრძელვადიანი, მდგრადი მშვიდობის მიღწევასა და მეზობელ ქვეყნებს შორის ურთიერთნდობისა და თანამშრომლობის გაღრმავებას.
შეხვედრაზე აღვნიშნეთ, რომ საჭიროა ორივე მხარემ ხელი შეუწყოს პარტნიორობის წახალისებას უმაღლეს და პროფესიულ საგანმანათლებლო დაწესებულებს, სამეცნიერო-კვლევით ცენტრებს შორის. ასევე მნიშვნელოვანია გამოცდილების ურთიერთგაზიარება ახალგაზრდობის პოლიტიკის სფეროში, ინოვაციებისა და ტექნოლოგიების, ხელოვნური ინტელექტის განვითარების საკითხებზე.
