“გაირკვა, რომ რასაც უწოდებდნენ ნატო-ს “ღია კარის” პოლიტიკას, ეს ყველაფერი აღმოჩნდა “ორპირი ქარის” პოლიტიკა,” – ეს განცხადება საქართველოს პრემიერ-მინისტრმა, ირაკლი კობახიძემ “ღამის კურიერის” ეთერში განაცხადა.
მისივე თქმით, ამ ვითარებაში, საქართველომ პრაგმატულად უნდა იმოქმედოს და გლობალური პროცესების შესაბამისად გადადგას ნაბიჯები.
“ჩვენ გვაქვს კონკრეტული პრიორიტეტები, ეს პრიორიტეტები კონსტიტუციაშიც არის ასახული. ამ კუთხითაც არის ძალიან სერიოზული გამოწვევები. რაც შეეხება ნატო-ს საკითხს – მოგეხსენებათ, რომ აშშ-ს აქვს გამოხატული შეცვლილი პოზიცია ნატო-ს გაფართოებასთან დაკავშირებით და ეს შეცვლილი პოზიცია არის უკრაინაში მიმდინარე ომის პირდაპირი გაგრძელება და გამოხატულება. საბოლოო ჯამში, გაირკვა, რომ რასაც უწოდებდნენ ნატო-ს “ღია კარის” პოლიტიკას, ეს ყველაფერი აღმოჩნდა “ორპირი ქარის” პოლიტიკა, – ეს დღეს აღნიშნა ბრიტანეთის ყოფილმა პრემიერმა, ბორის ჯონსონმა. ეს ძალიან სამწუხაროა.
აქაც, ჩვენ გვმართებს პრაგმატულობა, რაციონალური მიდგომა. უნდა შევხედოთ, როგორ განვითარდება გლობალურად პროცესები და ამის მიხედვით, ეროვნული ინტერესების შესაბამისად, უნდა გადავდგათ კონკრეტული ნაბიჯები,” – განაცხადა ირაკლი კობახიძემ.