ბათუმის მერმა გიორგი ცინცაძემ გადაცემაში „ვახო ხუზმიაშვილის თავისუფალი სივრცე“ 2026 წლის პრიორიტეტულ მიმართულებებზე ისაუბრა.
ბათუმის მერის, გიორგი ცინცაძის თქმით, „ბათუმი ავარიული სახლების გარეშე“ პროგრამის ფარგლებში ახალი საცხოვრებელი კორპუსების მშენებლობა აქტიურ ფაზაშია. მომდევნო წლის თებერვლის ბოლომდე დაახლოებით 600-მდე ოჯახი შეძლებს უსაფრთხო გარემოში ცხოვრებას. „ავარიული სახლების საკითხი სენსიტიურია და ხშირ შემთხვევაში გარკვეულ სირთულეებს უკავშირდება, განსაკუთრებით მრავალბინიან კორპუსებთან მიმართებაში. მოსახლეობის მცირე ნაწილის წინააღმდეგობაც კი, აფერხებს პროექტის განხორციელებას, როცა ისინი ინვესტორის მხრიდან უფრო კომერციულ შეთავაზებას ელოდებიან. პირადად ვერთვები ამ პროცესში, ვინაიდან ავარიულ სახლებს მაღალი რისკები აქვს და რაც უფრო დიდხანს გრძელდება პროცესი, მით მეტად იზრდება ეს რისკები,“ – აღნიშნა გიორგი ცინცაძემ.
მისივე თქმით, პარალელურად მიმდინარეობს მუშაობა ავარიული სახლების პროგრამის დახვეწაზე, რათა უფრო მოქნილი გახდეს პროგრამა და მაქსიმალურად შემცირდეს განხორციელების ვადები.
„სატრანსპორტო სისტემისა და სერვისის განვითარების მიმართულებით იგეგმება ახალი მუნიციპალური ავტობუსების შეძენა. მნიშვნელოვანია, რომ სატრანსპორტო სისტემა ეფუძნებოდეს რეალურ საჭიროებებს, ამიტომ იგეგმება სიღრმისეული კვლევები, რომლის ფარგლებშიც განისაზღვრება, რომელ მიმართულებებზეა საჭიროება ახალი სამარშრუტო ხაზების დამატების, ხაზების სიხშირის ცვლილების და რამდენად ეფექტიანად შეიძლება იმუშაოს ბასლაინების სისტემამ ბათუმში“, – აღნიშნა ბათუმის მერმა
გადაცემაში საუბარი შეეხო საბავშვო ბაღების მშენებლობის საკითხს. ბათუმის მერის განცხადებით, აქტიურად მიმდინარეობს მუშაობა საბავშვო ბაღების გაერთიანებასთან ერთად ახალი ბაღების ლოკაციების შერჩევაზე.
რაც შეეხება სპორტული ინფრასტრუქტურის მიმართულებას, როგორც ბათუმის მერმა აღნიშნა, უახლოეს პერიოდში დაიწყება რაგბის სტადიონის სარეაბილიტაციო სამუშაოები. პარალელურად, წლის განმავლობაში სკვერებთან ერთად, ქალაქის სხვადასხვა უბანში მოეწყობა სპორტული სივრცეები.