ევროპის ანტიკორუფციული კვლევების ცენტრმა (ევროპის ანტიკორუფციული და სახელმწიფო აღმშენებლობის კვლევის ცენტრი) ევროპის ქვეყნებში კორუფციის რისკის მიზეზების და ტენდენციების შესახებ ვრცელი ანგარიში გამოაქვეყნა. კვლევა ევროკავშირის წევრ და კანდიდატ ყველა, 41 ქვეყანას მოიცავს და მომზადებულია ევროკავშირის დაკვეთით ევროკომისიის კვლევისა და ინოვაციების პროგრამის ფარგლებში.
ანგარიშში სხვადასხვა თემასთან ერთად გაანალიზებულია ევროპის ქვეყნების საჯარო ანგარიშვალდებულების მარეგულირებელი მმართველობის საკითხი (გვ 62). რეიტინგში წარმატებული პოზიცია აქვს საქართველოს.
საჯარო ანგარიშვალდებულების რეგულირების ყოვლისმომცველობის შეფასების 100 ბალიანი სისტემით საქართველომ 75-ზე მაღალი ქულა დაიმსახურა და ევროპის საუკეთესო ხუთეულში მოხვდა.
რეიტინგში საქართველო უსწრებს შენგენის ზონის და ევროკავშირის წევრ 28 სახელმწიფოს: დიდ ბრიტანეთს, საფრანგეთს, გერმანის, იტალიას, ფინეთს, დანიას, ნორვეგიას, ირლანდიას, ნიდერლანდებს, ბელგიას, შვედეთს, შვეიცარიას, ესტონეთს, ლატვიას, ლიეტუვას, ჩეხეთს, სლოვაკეთს, ესპანეთს, პორტუგალიას, პოლონეთს, უნგრეთს, საბერძნეთს, ხორვატიას, ისლანდიას, კვიპროსს, ავსტრიას, მალტას, ლუქსემბურგს.
სარეიტინგო შეფასება ეფუძნება EuroPAM-ის მონაცემთა ბაზას გამჭვირვალობისა და ანგარიშვალდებულების შესახებ, რომელიც თავის მხრივ ზომავს ქვეყნის სამართლებრივი ჩარჩოს ყოვლისმომცველობას ადმინისტრაციული გამჭვირვალობისა და ანგარიშვალდებულების ხუთ სფეროში: თანამდებობის პირების ფინანსური გამჭვირვალობა, ინტერესთა კონფლიქტი, პოლიტიკური ფინანსები, ინფორმაციის თავისუფლება და სახელმწიფო შესყიდვების რეგულირება.
ევროპის ქვეყნებში კორუფციის რისკის მიზეზების და ტენდენციების შესახებ ვრცელი ანგარიში ევროკავშირის დაკვეთით ევროკომისიის პროგრამის ფარგლებში ევროპის ანალიზისა და პოლიტიკის ინსტიტუტის ჩართულობით მომზადდა პროექტის მიერ რომლის სახელწოდებაა „ანტიკორუფციული პოლიტიკის მტკიცებულებებში, რეგულაციებსა და გავლენას შორის არსებული ხარვეზის შევსება“.