ეკონომიკური წინსვლა, ინვესტიციების მოზიდვა, ცხოვრების პირობების გაუმჯობესება, მათ შორის პროდუქტებზე შესაძლო ფასების გაიაფება, ამ ოპოზიციის ინტერესებში არ შედის, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა.
მისივე თქმით, ოპოზიციისთვის მიუღებელია ყველაფერი ის, რაც რევოლუციას არ უწყობს ხელს.
„ერთი შეხედვით, თითქოს ოპოზიციისთვის ერთ-ერთი მთავარი მოთხოვნა უნდა ყოფილიყო, რომ ფასები იყოს სტაბილური, ან იაფი და ასე შემდეგ. როგორც კი ხელისუფლებამ დაიწყო ამ საკითხზე საუბარი, მაშინვე კრიტიკის ნიაღვარი წამოვიდა. ეს კიდევ ერთხელ მიგვანიშნებს, რომ ამ ოპოზიციის გაცხადებული მიზანია ე.წ. რევოლუცია. ამიტომ, ყველაფერი ის, რაც რევოლუციას არ უწყობს ხელს, არის მათთვის მიუღებელი და რა თქმა უნდა, ეკონომიკური წინსვლა, ინვესტიციების მოზიდვა, ცხოვრების პირობების გაუმჯობესება, მათ შორის პროდუქტებზე შესაძლო ფასების გაიაფება, ამ ოპოზიციის ინტერესებში არ შედის“, – განაცხადა ქადაგიშვილმა.
პრემიერ-მინისტრმა ირაკლი კობახიძემ სამომხმარებლო ფასებთან დაკავშირებით ვიდეომიმართვა გაავრცელა, რომელშიც აღნიშნულია, რომ მთავრობა აქტიურად იმუშავებს სადისტრიბუციო კომპანიებისა და მარკეტების ქსელების წარმომადგენლებთან, ფასების შემცირების მიზნით. სურსათის ფასების შემცირების მიზნით, ბიზნესთან კონსულტაციები დაიწყება. საგაზაფხულო სესიიდან სპეციალური კომისია შეიქმნება პარლამენტში. ფასების საკითხის დეტალურ შესწავლას სახელმწიფო უსაფრთხოების სამსახური იწყებს.