როგორც პასუხისმგებლობიანი ხელისუფლება ვალდებული ვართ, მაქსიმუმი გავაკეთოთ. ძალიან კომპლექსური საკითხია და ინკლუზიურად ვიმუშავებთ სახელმწიფოს ყველა შტო, რომ ეს პრობლემა ერთხელ და სამუდამოდ იქნას აღმოფხვრილი – განაცხადა ფრაქცია „ქართული ოცნების“ თავმჯდომარემ, უმრავლესობის ლიდერმა, ირაკლი კირცხალიამ პრემიერ-მინისტრის, ირაკლი კობახიძის ინიციატივასთან დაკავშირებით, სურსათის ფასების შემცირებაზე.
კირცხალიამ პრემიერის ინიციატივასთან დაკავშირებით ოპოზიციის გამოხმაურებებიც შეაფასა და აღნიშნა, რომ მათ არა საზოგადოების პრობლემები, არამედ მხოლოდ მათი ვიწრო მერკანტილური თუ თავიანთი აგენტურული პოლიტიკური ვნებები და მიზნები აინტერესებთ.
„მინდა გამოვეხმაურო ბატონი პრემიერ-მინისტრის ინიციატივას, რომ შეიქმნას კომისია. ჩვენი მხრიდან სრული მზაობაა. საგაზაფხულო სესიის დაწყებისთანავე, მინდა პირობა მივცე ჩვენს საზოგადოებას და პრემიერ-მინისტრს, რომ პირველი საკითხი იქნება ამ კომისიის შექმნა. და ამ კომისიაში ჩვენი საზოგადოება ნათლად დაინახავს და მოისმენს თუ რა გამოწვევები არის არარეალურად მაღალი ფასნამატების ირგვლივ.
რაც შეეხება ოპოზიციის განცხადებებს ამ საკითხთან დაკავშირებით- კიდევ ერთხელ მეტყველებს მათ რეალურ მიზნებზე. ამ უმნიშვნელოვანესი ინიციატივის შემდეგ და იმის შიშით, ვინც არაკეთილსინდისიერად იქცევა, ვნახეთ მათი რეალური სახე. ამ წლების მანძილზე მათი მხრიდან ნებისმიერი განცხადება, რომელიც კეთდებოდა ფასებთან დაკავშირებით, სრულიად პოპულიზმზე იყო აგებული. ამ მოღალატეების განცხადებით კიდევ ერთხელ დასტურდება, რომ მათ რეალურად არ აინტერესებთ საზოგადოების პრობლემები, არ აინტერესებთ ჩვენს ქვეყანაში მიმდინარე საკითხები, მათ აინტერესებთ ერთი- მხოლოდ და მხოლოდ მათი ვიწრო მერკანტილური თუ თავიანთი აგენტურული პოლიტიკური ვნებები და მიზნები. ასე რომ, კიდევ ერთხელ გამოჩნდა, თუ რაოდენ პოპულიზმით იყვნენ დაკავებულები მას შემდეგ, როდესაც ინიციატივიდან ერთ წუთში დადგნენ მაღალი ფასების მხარეს. დადგნენ იმის მხარეს, რაზეც სრულიად პოპულისტურად სპეკულირებდნენ თვეების მანძილზე ამ საკითხთან დაკავშირებით“- აღნიშნა კირცხალიამ.