პრეზიდენტმა სახელმწიფო ჯილდოებით – „ღირსების ორდენითა“ და „ღირსების მედლით“ თავდაცვის ძალების წარმომადგენლები დააჯილდოვა

საქართველოს პრემიერ-მინისტრისა და პარლამენტის თავმჯდომარის წარდგინებით, პრეზიდენტმა სახელმწიფო ჯილდოებით – „ღირსების ორდენითა“ და „ღირსების მედლით“ თავდაცვის ძალების წარმომადგენლები დააჯილდოვა. მიხეილ ყაველაშვილმა სამხედროებს ჯილდოს მიღება მიულოცა და ქვეყნის წინაშე გაწეული ღირსეული სამსახურისთვის მადლობა გადაუხადა.

პრეზიდენტის სასახლეში გამართულ ღონისძიებას საქართველოს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, ვიცე-პრემიერი, თავდაცვის მინისტრი ირაკლი ჩიქოვანი, თავდაცვის ძალების მეთაური, გენერალ-ლეიტენანტი გიორგი მათიაშვილი, თავდაცვის უწყების ხელმძღვანელი პირები და სამხედრო მოსამსახურეები დაესწრნენ.
ირაკლი ჩიქოვანის განცხადებით, ეს ჯილდო არის აღიარება და მაღალი შეფასება იმ განსაკუთრებული პიროვნული წვლილისთვის, რომელიც წლების განმავლობაში სამხედრო მეთაურებმა საქართველოს სახელმწიფოს მშენებლობისა და თავდაცვის ძალების განმტკიცების საქმეში შეიტანეს.
ღონისძიების დასასრულს, თავდაცვის მინისტრმა პრეზიდენტს, პრემიერ-მინისტრსა და პარლამენტის თავმჯდომარეს სამახსოვრო დაფები გადასცა.
„ღირსების ორდენით“ დაჯილდოვდნენ: საქართველოს თავდაცვის ძალების მეთაურის მოადგილე – გენერალური შტაბის უფროსი, გენერალ-მაიორი ჯონი ტატუნაშვილი, აღმოსავლეთის სარდალი, ბრიგადის გენერალი როლანდ ძნელაძე, დასავლეთის სარდალი, ბრიგადის გენერალი კობა გრიგოლია და ეროვნული თავდაცვის აკადემიის მეთაური, ბრიგადის გენერალი მამია ბალახაძე; ხოლო „ღირსების მედლით“ – სამხედრო გაწვევისა და რეკრუტირების ეროვნული სააგენტოს დირექტორი, პოლკოვნიკი ირაკლი ჭითანავა და თავდაცვის ძალების მთავარი სერჟანტი, მთავარი სერჟანტი გიორგი გოგოჭური.
სამხედრო მეთაურებს ჯილდო საქართველოს სახელმწიფოს აღმშენებლობისა და თავდაცვის შესაძლებლობების განმტკიცების საქმეში შეტანილი განსაკუთრებული წვლილისთვის გადაეცათ.