ბრიტანელმა დიპლომატმა, გლობალური კრიზისების მართვის ექსპერტმა, იან პრაუდმა „იმედის კვირისთვის“ მიცემულ ინტერვიუში გასულ წელს მსოფლიოში განვითარებული მოვლენებზე იმსჯელა. მან გააანალიზა როგორც „დიფ სთეითის“ მოქმედება, ისე უკრაინის საკითხის გარშემო შექმნილი სიტუაცია, შეერთებულ შტატებში მიმდინარე მოვლენები და ევროკავშირის როლი ახალ გეოპოლიტიკურ ვითარებაში.
იან პრაუდის შეფასებით, „დიფ სთეითისთვის“ 2025 წელი წარუმატებელი აღმოჩნდა.
„დიფ სთეითს“ სურდა, რომ უკრაინის ომი რუსეთზე დიდი სტრატეგიული გამარჯვება ყოფილიყო, მიუხედავად იმისა, რომ ნებისმიერი რაციონალურად მოაზროვნე ადამიანისთვის ეს თავიდანვე წარმოუდგენელი იყო“, – განაცხადა „იმედის კვირაში“ იან პრაუდმა.
უკრაინის ომის მიმართ ევროპის მიდგომებთან დაკავშირებით კი ანალიტიკოსმა აღნიშნა, რომ ევროპელები არასოდეს აპირებდნენ უკრაინისთვის ბრძოლას.
„დიდი სიამოვნებით ეხმარებიან უკრაინას ბრძოლასა და სიკვდილში, მაგრამ თავად ბრძოლა არ სურთ. ომის 4 წლის შემდეგ უკრაინა არის გაკოტრებული, მისი ინფრასტრუქტურა არის სრულიად მომსპარი“, – განაცხადა ბრიტანელმა ანალიტიკოსმა.
შეერთებულ შტატებში ბოლო პერიოდში განვითარებულ მოვლენებზე და დონალდ ტრამპის მიდგომებზე მსჯელობისას იან პრაუდი აღნიშნავს, რომ ტრამპი ამერიკას კვლავ დიადს ხდის.
„ის დიდ პატივს სცემს ძლიერ სახელმწიფოებს, ის ემხრობა ეროვნულ სახელმწიფოებსაც, იმ სახელმწიფოებს რომელთაც არ სურთ, არავისგან არჩეული ბრიუსელის ევრობიუროკრატიის დაკრულზე იცეკვონ“, – აღნიშნავს ყოფილი დიპლომატი.
მისივე შეფასებით, 2025 წელს ევროკავშირისთვის მთავარი გამოწვევა იყო ის, რომ უკრაინის ომის მოლაპარაკებებისას ის თამაშგარე მდგომარეობაშია
„ეს არის როგორც დონალდ ტრამპის თეთრ სახლში დაბრუნების, ასევე თავად ბრიუსელის ბრალი, ამავე დროს უკრაინასთან დაკავშირებით ევროპაში დიდი განხეთქილებაა“, – მიიჩნევს იან პრაუდი.
ამასთან, იგი აღნიშნავს, რომ ევროკავშირს გეოპოლიტიკურ ფიგურადაც კი არ განიხილავს.
„დონალდ ტრამპის მობრუნებამ კიდევ უფრო გააძლიერა სწორედ ეს მოსაზრება, რომ ევროკავშირი არავითარი გეოპოლიტიკური წონის მატარებელია, ის გახლავთ ეკონომიკური დაჯგუფება, რომელიც უკრაინაში, კონფლიქტის დაწყების დღიდან საკუთარი თავისგან გეოპოლიტიკური ძალის გამოძერწვას ცდილობს“, – აღნიშნავს ბრიტანელი ანალიტიკოსი.