ვლადიმერ ბოჟაძე: კარგია თუ სააკაშვილს ღმერთი გაახსენდა და იწამა. როდის აღნიშნავენ სომხები, კათოლიკეები, თუ სხვა ქრისტიანები [შობას], ეს მათი კალენდრით, მათი რწმენის საკითხია, – განაცხადა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ვლადიმერ ბოჟაძემ „ქრონიკასთან“.
დეპუტატი გამოეხმაურა მიხეილ სააკაშვილის პოსტს, რომელშიც ბრალდებული და მსჯავრდებული ექსპრეზიდენტი ქვეყანაში შობის 25 დეკემბერს აღნიშვნის სურვილს გამოხატავს.
„სამწუხაროდ, რადიკალური ოპოზიცია ცდილობს მუდმივად ეძებოს დაპირისპირების მიზეზი საზოგადოებაში. 25 დეკემბერი დღეს ქრისტიანული, მართლმადიდებლური კალენდრის 25 დეკემბერია. რაც შეეხება იმ კალენდარს, რომელიც არის კათოლიკური კალენდარი, რომელიც მთელმა მსოფლიომ მიიღო, დღეს 7 იანვარია. სამწუხაროა, რომ ისინი [ოპოზიცია] ვერც რელიგიაში ერკვევიან, ვერც რელიგიურ დოგმებში, ვერც კალენდარში. კარგია თუ სააკაშვილს ღმერთი გაახსენდა და იწამა. როდის აღნიშნავენ სომხები, კათოლიკეები, თუ სხვა ქრისტიანები [შობას] ეს მათი კალენდრით, მათი რწმენის საკითხია“, – აღნიშნა ბოჟაძემ.
მსჯავრდებული მიხეილ სააკაშვილი სოციალურ ქსელში წერს, რომ სულ მალე დადგება დრო, როცა საქართველო შობას აღნიშნავს ქრისტიანული ქვეყნების აბსოლუტურ უმრავლესობასთან ერთად – 25 დეკემბერს.