ძალიან წარმატებული იყო ევროობლიგაციების განთავსება ლონდონის საფონდო ბირჟაზე და ეს საბოლოო შედეგებმაც დაგვანახა, – განაცხადა გადაცემაში „იმედი LIVE“ ფინანსთა მინისტრმა, ლაშა ხუციშვილმა.
მისივე თქმით, საქართველომ გამოუშვა ევროობლიგაციები ლონდონის საფონდო ბირჟაზე, ეს იყო ბოლო 4 წლის საუკეთესო გამოშვება საქართველოს მსგავსი და ერთი საფეხურით უფრო მაღალი რეიტინგის მქონე ქვეყნებს შორის.
„ეს არის ნამდვილად ძალიან წარმატებული შედეგი. ამ წარმატების უკან დგას ძალიან დიდი სამუშაოები და პირველ რიგში ნდობა ინვესტორების მხრიდან. ნდობა პირველ რიგში არის საქართველოს მთავრობის და მისი მიერ განხორციელებული ეკონომიკური, ფისკალური და მონეტარული პოლიტიკის რეფორმებისა და როდესაც ვსაუბრობთ 2,8 მილიარდი დოლარის ინვესტიციასა და მზაობაზე საერთაშორისო ინვესტორების მხრიდან, ეს იყო 5 წლიანი განთავსება, ნიშნავს იმას, რომ ინვესტორები ენდობიან არა მხოლოდ საქართველოს მიერ აქამდე განხორციელებულ რეფორმებს, არამედ მომდევნო 5 წლის განმავლობაში იმ პოლიტიკას, რა პოლიტიკასაც გაატარებს საქართველოს ხელისუფლება ამ მხრივ.
ძალიან მნიშვნელოვანია, რომ დაახლოებით 100-ზე მეტი საერთაშორისო ინვესტორი იყო, რომელმაც უშუალოდ ტრანზაქციაში მიიღო მონაწილეობა, ესენი არიან ძალიან დიდი საინვესტიციო კომპანიები, რომელთაც აქტივები მართვაში რამდენიმე ასეული მილიარდი დოლარის აქვს. როდესაც მთელი მსოფლიოს მასშტაბით ინვესტორებმა ნდობა გამოუცხადეს საქართველოს ფასიან ქაღალდებს და ეს არის დიდი წარმატება“, – აღნიშნა ლაშა ხუციშვილმა.