თავისუფლების მოედანზე ვინც მივიდა, ინჟინერი, ექიმი, მასწავლებელი, სტუდენტი – ყველა, იქ ვინც მივიდა, მივიდა იმ განწყობით, რომ მოეწყოთ ნეპალი, სისხლიანი გადატრიალება საქართველოში, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, საქართველოში ექსტრემიზმის მხარდაჭერა გარედან ხდება.
„4 ოქტომბერს საქართველოს რამდენიმე ათასი მოქალაქე გამოვიდა თავისუფლების მოედანზე ნეპალის მოსაწყობად. იქ ვინც მივიდა, ინჟინერი, ექიმი, მასწავლებელი, სტუდენტი – ყველა, იქ ვინც მივიდა, მივიდა იმ განწყობით, რომ მოეწყოთ ნეპალი, სისხლიანი გადატრიალება საქართველოში, ეს იყო დაანონსებული. დაიწყეს კიდეც ამის განხორციელება, როდესაც პრეზიდენტის სასახლეზე მიიტანეს შტურმი. ერთადერთმა რამემ გადაგვარჩინა – ჩვენი უსაფრთხოების სისტემის პრევენციულმა მოქმედებამ, პოლიციელების, დაცვის სამსახურის და სხვა სტრუქტურების თანამშრომლების მოქმედებამ, რომლებმაც საკუთარი ჯანმრთელობის ფასად დაიცვეს კონსტიტუციური წესრიგი საქართველოში. 4 ოქტომბერი იქნა მხარდაჭერილი გარედან და ოთხი თვის თავზეც კი არ გმობს და არ ემიჯნება, ვინც მხარი დაუჭირა. დიახ, ეს არის მცდელობა გარედან ექსტრემიზმის ხელშეწყობისა, ექსტრემისტული მოძრაობების დაკვეთისა, რათა თავიანთი მომხრეების რადიკალიზაცია მოახდინონ და წაიყვანონ ძალადობრივი ქმედებებისკენ“, – განაცხადა პაპუაშვილმა.