მსოფლიო მთავრობათა სამიტზე გამართული შეხვედრები მოგვცემს საშუალებას, კიდევ უფრო გავაღრმაოთ ჩვენი ქვეყნის კავშირები სხვადასხვა მიმართულებით, – ამის შესახებ პრემიერ-მინისტრმა ირაკლი კობახიძემ დუბაიში ქართველ ჟურნალისტებს განუცხადა.
მთავრობის მეთაურის შეფასებით, დუბაის სამიტი პარტნიორებთან სხვადასხვა თემაზე საუბრის კარგ შესაძლებლობას იძლევა.
“განვიხილავთ პოლიტიკურ საკითხებსაც და განსაკუთრებული ყურადღება ეთმობა ამ ფორმატში ეკონომიკურ თანამშრომლობას. მქონდა გამოსვლა პლენარულ ფორმატში, ასევე მრგვალი მაგიდის ფორმატში. ყველგან ვისაუბრე იმასთან დაკავშირებით, როგორ ვითარდება ჩვენი ქვეყანა, როგორია ეკონომიკური ტენდენციები, რა ვითარებაა შექმნილი ჩვენს ქვეყანაში და ჩვენს გარშემო. რა თქმა უნდა, ასეთ თემებზე გვქონდა საუბარი ორმხრივ ფორმატშიც. გვქონდა საშუალება, არაერთი ქვეყნის ლიდერთან, ასევე საერთაშორისო ორგანიზაციების ლიდერებთან გვესაუბრა საქართველოსთან დაკავშირებულ საკითხებზე. მთლიანობაში, არის ძალიან საინტერესო ფორმატი და ვფიქრობთ, ის შეხვედრები, რომლებიც გვქონდა სამიტზე, მოგვცემს საშუალებას, კიდევ უფრო გავაღრმაოთ ჩვენი ქვეყნის კავშირები სხვადასხვა მიმართულებით. მათ შორის, ეს ფორმატი გვაძლევს ინვესტორებთან მუშაობის შესაძლებლობასაც“, – განაცხადა ირაკლი კობახიძემ.
