ვიტალი კლიჩკომ რუსეთი უკრაინელების წინააღმდეგ გენოციდში დაადანაშაულა, – ამის შესახებ კიევის მერმა დიდი ბრიტანეთის პარლამენტის საგარეო საქმეთა კომიტეტში ვიდეოჩართვის საშუალებით სიტყვით გამოსვლისას განაცხადა.
კლიჩკოს თქმით, რუსეთის ომში „წესები“ არ არსებობს.
„ეს ბრძოლა გენოციდია. უკრაინის აღმოსავლეთი მთლიანად განადგურებულია. ვლადიმერ პუტინის მთავარი მიზანია კიევისა და მთელი უკრაინის აღება. არ არის წყალი, ელექტროენერგია, გათბობა. ჩვენ ვიბრძვით გადარჩენისთვის“, – განაცხადა კლიჩკომ.
კიევის მერის თქმით, უკრაინას სჭირდება, რომ აშშ უკრაინის მხარეს იყოს.
„აშშ ძალიან მნიშვნელოვანი პარტნიორია, ჩვენ გვჭირდება აშშ უკრაინის მხარეს. ძალიან მნიშვნელოვანია პრეზიდენტ ტრამპთან კარგი ურთიერთობა და გაგება. ძალიან მნიშვნელოვანია უკრაინაში დემოკრატიის გადარჩენა, რაც თავის მხრივ ევროპას გააძლიერებს“, – განაცხადა კლიჩკომ.
ამასთან, კიევის მერს უკრაინის პრეზიდენტთან, ვოლოდიმირ ზელენსკისთან ურთიერთობის შესახებ ჰკითხეს. კერძოდ, ესაუბრა თუ არა ზელენსკის მას შემდეგ, რაც იანვარში კლიჩკომ განაცხადა, რომ რამდენიმე წლის განმავლობაში პირადად არ შეხვედრიან ერთმანეთს.
„ჩვენ არ გვაქვს მარტივი ურთიერთობა თვითმმართველობასა და ცენტრალურ მთავრობას შორის, ეს მხოლოდ ჩემი აზრი არ არის, ეს ბევრი მერის აზრია. გვესმის, რომ ომის დროს პრეზიდენტობა ადვილი არ არის. პრეზიდენტი დაკავებულია და არ მინდა წუწუნი. მაგრამ ყოველ შემთხვევაში, ქვეყნის შიგნით ერთიანობა პოლიტიკური თამაშების გარეშე გაცილებით გვაძლიერებს. კონკურენცია, პოლიტიკური კონკურენცია ან მსგავსი რამ, ეს არ არის ჭკვიანური და სწორედ ამიტომ ვუთხარი პრეზიდენტს, რომ არ გავეკრიტიკებინეთ. ჩვენ ამ საქმისთვის კარგად არ ვიყავით მომზადებულები. ბოდიშს გიხდით, მე არ ვარ პასუხისმგებელი საჰაერო თავდაცვაზე. ბოდიში, ჩვენ ყველაფერს ვაკეთებთ, რაც შეგვიძლია. მე ღიად ვუთხარი პრეზიდენტს, რომ ეს რუსების დღის წესრიგია. ჩვენ გვაქვს რამდენიმე მაგალითი. ვინ არის დამნაშავე? თვითმმართველობა. ვინ არის დამნაშავე? ცენტრალური მთავრობა. ვინ არის დამნაშავე? კომპანია, რომელმაც ენერგია მოგვაწოდა. ჩვენ ერთმანეთის წინააღმდეგ ვიბრძვით. მე ვუთხარი პრეზიდენტს, გთხოვთ, ნუ მიჰყვებით პუტინის დღის წესრიგს. ჩვენ უნდა ვიყოთ ერთიანები, უნდა დავუჭიროთ მხარი ერთმანეთს, რომ ერთად ვიბრძოლოთ. ერთად ძლიერები ვართ“, – განაცხადა კლიჩკომ.