რიტორიკულად დავსვამდი კითხვას – სოციალურად დაუცველ ოჯახთა ბაზის გადამოწმების დაწყება სწორი გადაწყვეტილებაა თუ არასწორი? ამ შემთხვევაში პასუხი ძალიან მარტივია და საზოგადოება თავად შეაფასებს, – განაცხადა ჯანდაცვის მინისტრმა, მიხეილ სარჯველაძემ.
მინისტრის თქმით, სოციალურად დაუცველთა ბაზა უნდა იყოს სამართლიანი და ზუსტად ასახავდეს რეალურ მდგომარეობას.
მან ხაზი გაუსვა, რომ სოციალური და ჯანმრთელობის დაცვის მიმართულებით მოქმედი სახელმწიფო პროგრამების მთავარი მიზანი მოსახლეობის გაძლიერებაა.
„სახელმწიფო მუშაობს არა მხოლოდ შემწეობის გაცემისა და დასაქმების მიმართულებით, არამედ ოჯახების გაძლიერებაზე. მთავარი ინდიკატორია ის, რომ სიღარიბის მაჩვენებელი კლებადია, ხოლო უმუშევრობა ისტორიულ მინიმუმზეა. მნიშვნელოვანია სოციალურად დაუცველთა გაძლიერება და ისეთი შესაძლებლობების შექმნა, რაც სიღარიბის დაძლევას უზრუნველყოფს“, – აღნიშნა მინისტრმა.
მისივე განცხადებით, სოციალურად დაუცველთა ბაზების გადამოწმებას სისტემური ხასიათი ექნება.
„მნიშვნელოვანია, რომ სისტემა მუდმივად ფუნქციონირებდეს. ბაზა ცოცხალი ორგანიზმივითაა და საჭიროებს მუდმივ რეაგირებას – მონაცემების შეგროვებას, დამუშავებასა და შეფასებას. ეს პროცესი უახლოესი რამდენიმე თვის განმავლობაში განხორციელდება, შესაძლოა, დაახლოებით ნახევარწლიანი პერიოდი იგულისხმებოდეს. ამ დროის განმავლობაში დაგროვდება მნიშვნელოვანი მონაცემები, რომლებიც არსებით სურათს შექმნის“, – განაცხადა მიხეილ სარჯველაძემ.