საკმაოდ კარგი ურთიერთობები გვაქვს ჩვენს მეზობლებთან, თურქეთთან, რეგიონის სხვა ქვეყნებთან. ყველა ვთანხმდებით, რომ ჩვენი რეგიონი არის საკმაოდ მიმზიდველი, დიდი შესაძლებლობების მქონე და უნდა გახდეს კიდევ უფრო მიმზიდველი, – განაცხადა საქართველოს პრეზიდენტმა, მიხეილ ყაველაშვილმა გადაცემაში „აქტუალური თემა – მაკა ცინცაძესთან ერთად“.
როგორც პრეზიდენტმა აღნიშნა, მეზობელმა ქვეყნებმა კარგად იციან, რომ შეუძლებელია საქართველოს გარეშე განხორციელდეს პროექტები და შუა დერეფნის თემა არის ერთ-ერთი განვითარების მნიშვნელოვანი პლაცდარმი.
„ზოგჯერ ჩვენ არ გვახსენებენ ხოლმე სხვა ქვეყნის ლიდერები, მაგრამ წარმოუდგენელია, საქართველოს გარეშე განხორციელდეს პროექტები. ეს ძალიან კარგად იციან ჩვენმა მეზობლებმა და დიდი მადლობა მათ. შუა დერეფნის თემა არის ერთ-ერთი განვითარების მნიშვნელოვანი პლაცდარმი, როგორც აზიისა და ევროპის დამაკავშირებელი, ასევე, პირდაპირ კავშირშია იმასთან, რომ სამშვიდობო პროცესებიც კი ამ რეგიონში გადაწყდეს. ჩვენ ამაზე ვართ მოტივირებული“, – განაცხადა მიხეილ ყაველაშვილმა.