ქართველ ხალხზე ფიქრობენ, რომ თავისუფლებასა და ვიზას შორის ხალხი აირჩევს ვიზას, – ასე შეაფასა საქართველოს პარლამენტის თავმჯდომარე შალვა პაპუაშვილმა ევროკომისიის პრეზიდენტის, ურსულა ფონ დერ ლაიენის ოპოზიცის წარმომადგენლებისადმი გამოგზავნილი წერილი, რომელშიც წერს, რომ „ვიზების შეჩერება შეიძლება, მთელ მოსახლეობაზე გავრცელდეს, თუ საქართველოს ხელისუფლება საკითხებს არ მოაგვარებს“.
პაპუაშვილის თქმით, ასეთი განცხადებები კარგია, რათა დავინახოთ, სინამდვილეში რასთან გვაქვს საქმე. მისივე თქმით, ევროკავშირის ხელმძღვანელობაში ჩვეულებრივი შანტაჟიორები არიან.
„აშანტაჟებენ მთელ ერს, რისთვის? საბაბებმა არ დაგვაბნიოს. მთავარი მიზეზია ის, რომ საქართველოს ხელისუფლებაში არ არის ის ხალხი, რომელიც მათ უნდოდათ, რომ ყოფილიყო. ევროკავშირის ელჩი თავად იყო ჩართული საარჩევნო კამპანიაში. თბილისში ურსულა ფონ დერ ლაიენის წარმომადგენელი თავად იყო ჩართული „ქართული ოცნების“ წინააღმდეგ კამპანიაში. ის დამარცხდა ამ არჩევნებში, „ოცნებამ“ გაიმარჯვა და ამის შემდეგ ჩვენ ვხედავთ მუდმივ თავდასხმებს საქართველოს წინააღმდეგ. აფინანსებდნენ ორგანიზაციებს საარჩევნო კამპანიის მიზნით. ეს ყველაფერი არის ფაქტები, რომ საქართველოში 2024 წელს ურსულა ფონ დერ ლაიენის წარმომადგენელი ელჩი ჩართული იყო „ქართული ოცნების“ წინააღმდეგ კამპანიაში. „ქართულმა ოცნებამ“ გაიმარჯვა და ამის შემდეგ ვხედავთ მუდმივ თავდასხმებს საქართველოს წინააღმდეგ. შანტაჟის მთავარი სათქმელია, რომ „ქართველო ხალხო, ან დაემორჩილებით ჩვენს ნებას და გააკეთებთ იმას, რასაც ჩვენ გეტყვით, თქვენს მოსამართლეებს, პროკურორებს ჩვენ დავნიშნავთ, დაგაკანონებინებთ ერთნაირსქესიანთა ქორწინებას, როგორც ამას სთხოვენ ახლა ყველას, მიგაღებინებთ ამ კანონს, გაგაუქმებინებთ იმ კანონს, რასაც გეტყვით, იმას გააკეთებთ, ან მაშინ მოგიწევთ, მოხვიდეთ ჩვენთან საელჩოში ვიზის ასაღებად“. ამ დონეზე ფიქრობენ ქართველ ხალხზე, რომ ქართველი ხალხი თავისუფლებასა და ვიზას შორის აირჩევს ვიზას“, – აღნიშნა პაპუაშვილმა.
ამასთან, როგორც პარლამენტის თავმჯდომარემ განაცხადა, „ევროპა გონზე არ არის, ვისთან აქვს საქმე, რომ შეიძლება, ქართველ ხალხს უთხრა – ვიზა გინდა თუ თავისუფლებაო“.
„ამდენი ხანია, 35 წელია, გაგვიცნეს მას შემდეგ, რაც ეს „რკინის ფარდა“ ჩამოიშალა. ჩამოვიდნენ აქ, ხინკალიც ჭამეს, ხაჭაპურიც და ქართლის დედასაც შეხედეს, „ვეფხისტყაოსნის“ ორი სტროფიც წაიკითხეს. ეს ყველაფერი გააკეთეს და გონზე არ არიან, ვისთან აქვთ საქმე, რომ შეიძლება, ქართველ ხალხს უთხრა – ვიზა გინდა თუ თავისუფლებაო. პირველი ხომ არ იქნება ევროკავშირი, რომ ეს გვითხრა. ჩვენ ვიზები სხვებმა ჩაგვიკეტეს სხვადასხვა პერიოდში. ეკონომიკური სანქციებიც დაგვიწესეს, ვიზაც გაგვიუქმეს და ა.შ. თავისუფლება გინდათ თუ ვიზა?! აი, რა გზაზე დგას დღეს ევროკავშირი ამ ხელმძღვანელობის ხელში, რომ ფიქრობენ, ხალხი შეიძლება არჩევანის წინაშე დააყენო, თავისუფლება თუ ვიზა და იფიქრო, რომ ეს ხალხი აირჩევს ვიზას. რა წარმოდგენა აქვთ საერთოდ სხვა ხალხებზე, რომელი საუკუნის ევროპის წარმომადგენლები არიან, რომ სხვა ხალხებზე ასე ფიქრობენ, რომ გემიდან ჩამოვლენ, დახვდებათ რაღაც უცხო ტომი, რომელსაც ეტყვიან, შენ მოგცემ სასმელს და ამის ხარჯზე მთელ ოქროულობას წამოიღებენ. ასე რომ აცურებდნენ ხალხებს, ეს პერიოდი უკვე დიდი ხანია, წავიდა ისტორიიდან. ეს ყველაზე კარგად მეტყველებს, რა ღირებულებით უფსკრულში არის დღეს ბრიუსელი, როდესაც ფიქრობს, რომ სხვა ხალხს შეუძლია, არჩევანი დაუყენოს თავისუფლებასა და ვიზას შორის. ამავე დროს, შეურაცხყოფას აყენებს იმ ხალხს, რომ ფიქრობს, ხალხი აირჩევს უვიზოს და არა თავისუფლებას“, – განაცხადა პაპუაშვილმა.
ამასთან, კითხვაზე, რომ „ისინი ამბობენ, ეს არის საქართველოში დემოკრატიის გადარჩენის ერთადერთი გზა და არა არჩევანი ვიზასა და თავისუფლებას შორის“, პაპუაშვილმა განაცხადა:
„ტყუილი, ისტორიულად დადასტურებული ტყუილია. შეგახსენებთ, უვიზო მიმოსვლა 2010 წელს, გაგანია დიქტატურაში ევროკავშირმა მისცა სააკაშვილის რეჟიმს, მხოლოდ რეჟიმს, ხალხს არ მოგვცა. თითქოს რომ ხალხზე ზრუნავენ, ხაშურიდან სიღნაღით დამთავრებული, მისცა სააკაშვილის რეჟიმს. ამ წამების სისტემის შემქმნელს, მკვლელობების ჩამდენებს, ამ მთლიან სისტემას, ელიტას მისცა უვიზო მიმოსვლა. ასე რომ, ამ ტყუილს უკვე ქართველი ხალხი არ გაატარებს“, – განაცხადა შალვა პაპუაშვილმა.