გიორგი თარგამაძემ საბოლოოდ გამოიყვანა არხი პატარკაციშვილის დაქვემდებარებიდან, – წერს ყოფილი პრეზიდენტი, მსჯავრდებული მიხეილ სააკაშვილი სოციალურ ქსელში ტელეკომპანია „იმედის“ შესახებ.
იგი მისი მმართველობის დროს „იმედის“ საქმიანობას იხსენებს და აღნიშნავს, რომ ეს ტელეკომპანია მისი მთავრობის წინააღმდეგ მუშაობდა.
„ვისაც არ უნდა გეწყინოთ, იმედი ზუსტად იმავეს აკეთებდა 2006-2007 წლებში. როგორც კი რუსი ჯაშუშები დავაკავეთ და რუსეთმა დაიწყო ქართველების გამოყრა და შემოიღო ემბარგო.
რუსი ოლიგარქის პატარკაციშვილის “იმედი” მთელი ძალით ამუშავდა ჩვენი პრო-დასავლური მთავრობის წინააღმდეგ კლასიკური ნიმუში იყო დადგმული რეპორტაჟების სერია იმის შესახებ თუ როგორ ჩეხავდნენ კახელები ვენახს, იმის ფონზე რომ რუსეთის ემბარგოს მე მაბრალებდნენ.
ამ ყველაფერმა პიკს მიაღწია 2007 წლის შემოდგომაზე, როცა თბილისში იგეგმებოდა ნატოს გენერალური მდივნის ჩამოსვლა და ჩვენთვის MAP-ის მინიჭების შესახებ წინასწარი გადაწყვეტილების მიღება, ნატოს მიერ ორგანიზებულ თბილისის კონფერენციაზე.
მიმდინარეობდა ისტერიული სურვილის გაღვივება ჩვენი მთავრობის დამხობის მიზნით. იმედმა მხარი დაუჭირა ჯღანას კრიმინალური ჯგუფის მხარდაჭერის აქციას. უშვებდა ჩემზე კლიპებს სადაც “უცნობი” წარმოადგენდა კალიგულას – გარყვნილი რომაული იმპერატორის სახით.
იმედი მაშინაც წყვილში მუშაობდა შალვა რამიშვილის 202 არხთან. ზუსტად ისეთივე ტექნოლოგიით, როგორც ახლა.
მას შემდეგ რაც გამოქვეყნდა პატარკაციშვილის ჩანაწერები, რომლებშიც ის ავალებდა მკვლელობას და დეტალურად ჰყვებოდა არჩევნების ჩაშლის გეგმას, გიორგი თარგამაძემ საბოლოოდ გამოიყვანა არხი პატარკაციშვილის დაქვემდებარებიდან. იმედის ბევრმა ჟურნალისტმა, სხვაგან გააგრძელა საქმიანობა, ძალიან ღირსეულად უჭირავს თავი. გიორგი თარგამაძე დღეს ჩემი ერთ-ერთი ყველაზე საყვარელი ჟურნალისტია.
აი ახლა მინდა ყველაფერი იმის ფონზე რაც ახლა იცით – უნდა დახურულიყო თუ არა მაშინდელი “იმედი”? (ოღონდ ჩვენ მხოლოდ 5 დღით დავხურეთ)”, – წერს სააკაშვილი.