საუბარი გვქონდა სტრატეგიული პარტნიორობის ახალი შეთანხმების შესახებ, ჩვენ დავუდასტურეთ მზაობა, რომ მზად ვართ დავიწყოთ მუშაობა ახალ შეთანხმებაზე, – განაცხადა პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ შეერთებული შტატების სახელმწიფო დეპარტამენტის ევროპისა და ევრაზიის საკითხთა ბიუროს ხელმძღვანელთან, ბრენდან ჰანრაჰანთან შეხვედრის შესახებ, რომელიც ცოტა ხნის წინ დასრულდა.
სამხარაძის თქმით, შეხვედრაზე ისაუბრეს ორმხრივი ინტერესის, ასევე საქართველოს უსაფრთხოების, შუა დერეფნისა და ამერიკული კომპანიების ინვესტიციების საკითხებზე.
„შეხვედრამ საკმაოდ მეგობრულ ატმოსფეროში ჩაიარა. ჩვენ ვისაუბრეთ ორმხრივი ინტერესის ძალიან ბევრ საკითხზე, მათ შორის ვისაუბრეთ ღირებულებით თანხვედრაზე, რომელიც ჩვენს ხელისუფლებას გააჩნია ამერიკის ახალ ადმინისტრაციასთან.
ვისაუბრეთ საქართველოს უსაფრთხოების გამოწვევებზე, ოკუპაციიდან მომდინარე მომდინარე საფრთხეებზე, რეგიონში მიმდინარე მოვლენებზე გავამახვილეთ ყურადღება, ასევე რა გავლენა აქვს ამ მოვლენებს საქართველოს უსაფრთხოებაზე. გვქონდა საუბარი შუა დერეფნის განვითარების საკითხებზე, მათ შორის „ტრამპის მარშრუტის“ საკითხზე და აღვნიშნეთ, რომ ჩვენ მოვესალმებით ტრამპის მარშრუტის განხორციელებას, რადგან მივიჩნევთ, რომ ეს არ არის ალტერნატივა შუა დერეფნისთვის და საქართველოს მარშრუტისთვის, პირიქით, ეს არის შემავსებელი ფაქტორი.
ასევე გვქონდა საუბარი ამერიკული კომპანიების მიერ საქართველოში ინვესტიციების დაბანდებაზე. და რაც მთავარია, საუბარი გვქონდა სტრატეგიული პარტნიორობის ახალი შეთანხმების შესახებ, ჩვენ დავუდასტურეთ მზაობა, რომ მზად ვართ დავიწყოთ მუშაობა ახალ შეთანხმებაზე, რომელიც იქნება მიმართული ორმხრივი სარგებლის მიღებისკენ. გამოვყავით მრავალი თემა, რომელიც ამ პარტნიორობას კიდევ უფრო ძლიერს გახდის. შესაბამისად, შემიძლია ვთქვა, რომ ძალიან საინტერესო და ნაყოფიერი დისკუსია გვქონდა და ამ საკითხებზე მსჯელობას მომავალშიც აქტიურად გავაგრძელებთ“, – განაცხადა ნიკოლოზ სამხარაძემ.