ჩვენი მთავარი პრინციპია, სახელმწიფო სერვისები რაც შეიძლება ახლოს იყოს მოქალაქესთან, 2012 წელს ქვეყნის მასშტაბით მხოლოდ 11 იუსტიციის სახლი ფუნქციონირებდა, დღეს ის ხელმისაწვდომია 127 მისამართზე და ყოველდღიურად 20 000-ზე მეტ ადამიანს ემსახურება, – ამის შესახებ საქართველოს პრემიერ-მინისტრმა ირაკლი კობახიძემ ხელვაჩაურის იუსტიციის სახლის გახსნის ღონისძიებაზე სიტყვით გამოსვლისას განაცხადა.
ხელვაჩაურის იუსტიციის სახლში, რომელიც აჭარაში რიგით მეცხრეა, ადგილობრივებს ექნებათ საშუალება, თანამედროვე ინფრასტრუქტურაში მიიღონ ყველა მომსახურება, რომელთაც იუსტიციის სახლი უზრუნველყოფს.
როგორც მთავრობის მეთაურმა აღნიშნა, აჭარაში დიდია მოთხოვნა იუსტიციის სახლის სერვისებზე, რითაც ყოველწლიურად 700 000-ზე მეტი მომხმარებელი სარგებლობს.
„რეგიონში მუშაობს მობილური იუსტიციის სახლიც, რომელსაც ათეულობით სოფელში მომსახურება უშუალოდ ადგილზე მიაქვს. ეს არის ჩვენი მთავარი პრინციპი, რომ სახელმწიფო სერვისები რაც შეიძლება ახლოს იყოს მოქალაქესთან. ზუსტად ამ პრინციპით მოქმედებს იუსტიციის სახლი.
გრძელდება გეოგრაფიული ხელმისაწვდომობის ზრდა. სულ მალე რამდენიმე ქალაქსა და დასახლებაში გავხსნით ახალ სივრცეებს, რითაც ფილიალების საერთო რაოდენობა 132-მდე გაიზრდება. ჩვენი მიზანია მუდმივად კიდევ უფრო გავაუმჯობესოთ მომსახურების სტანდარტები. დღეისათვის იუსტიციის სახლში ხელმისაწვდომია 500-მდე მომსახურება და უახლოეს მომავალში დაგეგმილია ამ რაოდენობის გაორმაგება, რაც გაზრდის ჩვენი მოქალაქეების წვდომას როგორც სახელმწიფო, ისე კერძო სექტორის მომსახურებაზე. ამასთან ერთად ინერგება თანამედროვე ტექნოლოგიები და უკვე აქტიურად იგეგმება იუსტიციის სახლის პრაქტიკაში ხელოვნური ინტელექტის დანერგვა”, – განაცხადა ირაკლი კობახიძემ.
პრემიერ-მინისტრმა იუსტიციის სამინისტროს და პროექტის განხორციელებაში ჩართულ ყველა ადამიანს მადლობა გადაუხადა, ხელვაჩაურის მოსახლეობას იუსტიციის სახლის გახსნა მიულოცა და ფილიალის თანამშრომლებს წარმატებები უსურვა.
ხელვაჩაურის იუსტიციის სახლის გახსნის ღონისძიებაზე სიტყვით გამოვიდნენ იუსტიციის მინისტრი პაატა სალია, აჭარის ავტონომიური რესპუბლიკის მთავრობის თავმჯდომარე სულხან თამაზაშვილი და იუსტიციის სახლის თავმჯდომარე ვახტანგ ჟვანია. მთავრობის მეთაურმა ახლად გახსნილი იუსტიციის სახლი დაათვალიერა.
